Con motivo do 23 de setembro, Día Internacional da Bisexualidade, Podemos Ourense presenta requirimentos ao concello para avanzar na defensa dos dereitos das persoas bisexuais e combater a bifobia, unha das discriminacións máis invisibilizadas dentro e fóra do colectivo LGTBIQA+.
O textos lembra que, a pesar de dispoñer da Lei galega 2/2014 e da Lei estatal 4/2023, ambas non se aplican de maneira efectiva, deixando ás persoas bisexuais sen recursos nin programas específicos fronte á discriminación múltiple que sofren nos ámbitos laboral, educativo, sanitario e cultural.
📌 Datos preocupantes en Ourense
- No ano 2024 houbo 3 delitos de odio coñecidos por orientación sexual ou identidade de xénero, practicamente os mesmos que en 2023 (4 casos).
- En 2024 rexistráronse tamén 2 persoas investigadas por infraccións penais especificamente contra persoas pola súa orientación sexual ou identidade de xénero.
- A taxa destes delitos en Ourense está por riba da media galega, deixando claro que non se trata de feitos illados, senón dun problema social que require resposta institucional.
- Unha chamada á acción
Francisco Diéguez, portavoz de Podemos Ourense, advertiu que “Ourense non pode seguir a mirar cara outro lado mentres se perpetúan agresións e discriminacións contra o colectivo LGTBIQA+”.
Diéguez lembrou que a súa propia experiencia denunciando a retirada dun mural contra a LGTBIfobia no CEIP Froebel de Pontevedra é “un exemplo claro da miña determinación persoal por loitar contra a discriminación en todos os ámbitos, tamén no educativo”.
“Queremos que se apliquen as leis xa —engadiu—. Non abonda con declaracións de boas intencións: necesitamos recursos, protocolos de actuación e campañas de sensibilización que cheguen a toda a sociedade para frear máis agresións”.
Requirimento de Podemos Ourense
Ante esta realidade, Podemos Ourense solicita aos concellos que:
- Esixan á Xunta de Galicia a aplicación inmediata da Lei galega 2/2014, con protocolos específicos de atención ás persoas bisexuais.
- Exixan a execución real da Lei estatal 4/2023, con orzamentos suficientes para programas contra a bifobia.
- Apoien a educación en diversidade en todos os niveis, incorporando de maneira explícita a bisexualidade.
- Garanten a visibilidade institucional e mediática do Día da Bisexualidade.
- Reclamen a recollida de datos específicos sobre a realidade bisexual en Galicia.
Podemos Ourense reafirma, con esta acción, o seu compromiso firme e combativo coa igualdade e a diversidade, situando a defensa da bisexualidade como parte esencial da loita polos dereitos LGTBIQA+ na provincia. “Ourense debe ser unha terra libre de odio”, concluíu Diéguez.
