Impulsado polas empresas Con de tres pés, Etiqueta Negra e Ainé Producións, o proxecto súmase ás máis de 3.000 actividades programadas este verán no marco do Xacobeo 21-22 co obxectivo de reactivar o sector cultural
O novo ciclo Comicamente, impulsado polas empresas Con de tres pés, Etiqueta Negra e Ainé Producións co apoio da Xunta, encara este venres a súa última fin de semana. Será en Pontevedra con Xosé A. Touriñán, Carlos Blanco, David Amor e Lucía Veiga, e coa disc-jóckey Toccororo a cargo da música en directo. A explanada do recinto feiral acollerá dous pases das actuacións, un ás 19,00 e outro ás 22,00 horas. Quedan entradas dispoñibles para o primeiro deles a través das webs comicamente.gal e de ataquilla.com.
A iniciativa naceu co obxectivo de levar o humor galego a 12 concellos da Comunidade ata mediados de setembro, no marco da programación do Xacobeo 21-22. Súmase así ás iniciativas postas en marcha pola Xunta co obxectivo de contribuír á reactivación do sector cultural.
Carlos Blanco, Xosé A. Touriñán, Luis Piedrahita, xunto a Lucía Veiga, lideran o ciclo, que conta coa participación doutros referentes do humor galego, como David Amor, Oswaldo Digón, Marta Doviro, Marita Martínez, Carmen Méndez, David Perdomo, Celso Sanmartín, Ledicia Sola e Pepo Suevos.
Comicamente arrincou a finais de xullo no Carballiño e ademais de Pontevedra, incluíu no seu percorrido Vilargarcía de Arousa, Sanxenxo, Lugo, Mondoñedo, Ferrol, Nigrán, Ourense, A Coruña e Santiago. Todos os espectáculos están a ser en emprazamentos ao aire libre e cunhas moi coidadas postas en escena.
O domingo péchase o programa en Lalín, con Xosé A. Touriñán, Carlos Blanco, Celso Sanmartín e Lucía Veiga.
