As propostas comezaron o pasado 7 de xaneiro, día no que se cumpriron 75 anos da morte do artista e intelectual galeguista, e continuarán en febreiro
O presidente Luis López animou aos pontevedreses a inscribirse nas visitas e a descubrir o seu legado e a súa vida a través da páxina web do Museo
A Deputación de Pontevedra participa na celebración do Ano Castelao, no que se conmemora o 75 aniversario do falecemento do artista e intelectual galego, no Museo de Pontevedra cunha ampla programación para celebrar a súa vida e legado. Unha programación que, como explicou o presidente provincial, Luis López, arrancou o pasado martes 7 de xaneiro, cunha visita guiada e unha sesión de cine e música, mais que continuará ao longo de todo o ano. “Queremos, con estas actividades, e nun ano tan especial como este, manter vivo entre nós a Castelao, na cidade que tanto quería e nunha provincia coa que tiña tan fondo vínculo como a nosa, como era a súa vontade”, confirmou.
En concreto, as visitas guiadas ás salas que o Museo de Pontevedra lle dedica a Castelao e que se estrearon o pasado 7 de xaneiro con grande éxito, repetiranse todos os primeiros martes de cada mes, sendo a próxima o 4 de febreiro, e é necesario reservar prazas a través da web.
Ademais, López animou a todos e todas as pontevedresas a descubrir o legado e a vida “dun dos nosos máis ilustres intelectuais” a través da web do Museo, ben explorando as obras que forman a súa colección no Museo (https://museo.depo.gal/coleccion/explora-a-coleccion/-/patrimonio/coleccion/27), realizando unha visita virtual polas salas do Museo (https://museo.depo.gal/web/museo/visita-virtual/castelao-artista-personaje-clave-galicia-ga) ou descargando en PDF o libro ‘Esenciais. Castelao no Museo de Pontevedra, unha introdución á súa figura e á obra presentes na nosa institución (https://museo.depo.gal/documents/75239/75332/Esenciais_Castelao_web.pdf).
