O obxectivo desta iniciativa, para a que a institución provincial achega 15.000 euros, é organizar sesións informativas en todos os concellos da provincia
As xornadas “Alzheimer de preto”, organizadas pola Federación Atlántica de Asociacións de Familias de Persoas con Alzhéimer e outras demencias (FADEAL) e a Deputación de Pontevedra, continúan o seu percorrido pola provincia e chegarán esta semana a seis concellos da provincia: Nigrán, Vigo, Pontecesures, Soutomaior, O Porriño e Caldas de Reis. A través desta iniciativa, para a que a institución provincial achega 15.000 euros, organizaranse sesión formativas sobre esta enfermidade nos 61 concellos da provincia.
En concreto, este martes 5 de novembro o proxecto chega a Nigrán, concretamente ao Centro Social de Maiores, onde haberá unha segunda sesión o martes 12, ambos días de 16:30 a 18:30 horas. O mércores 6 de novembro terá lugar en Vigo, na UTS Coia (Servizos Sociais) de 9:30 a 13:30 horas; en Pontecesures, na Casa do Concello de 16:00 a 20:00 horas, e en Soutomaior, no Multiusos de Arcade de 16:00 a 20:00 horas. Ademais, no Porriño a xornada “Alzhéimer de preto” terá lugar os xoves 7 e 14 de novembro, de 16:30 a 18:30 horas nos dous casos, no Auditorio do Centro Cultural e, por último, a Caldas de Reis chegará o venres 8 de novembro, de 16:00 a 20:00 horas no Auditorio Municipal.
O obxectivo destas xornadas é que familias coidadoras, persoas diagnosticadas e a poboación en xeral poderán coñecer de preto a enfermidade, a súa evolución ou pautas para facilitar o día a día dos doentes, isto é, información, asesoramento e orientación a todas as persoas interesadas de todos os recunchos da provincia, atendendo especificamente as persoas que residen no rural. Concretamente, abordaranse os primeiros pasos tralo diagnóstico desta ou outras enfermidades neurodexenerativas, darase orientación sobre recursos asistenciais e sanitarios, tratamentos farmacolóxicos e non farmacolóxicos, así como facilitaranse novidades en canto a investigación, pautas para o manexo no fogar ou fóra del, ou tramitación documental e asesoramento legal.
O proxecto financiado pola Deputación será xestionado a través das entidades asociadas da federación, que serán as encargadas de realizar as sesións informativas ao longo da provincia: a Asociación de Familiares de Enfermos de Alzhéimer e outras demencias de Pontevedra (AFAPO), a Asociación de Familiares de Persoas con Alzhéimer e outras demencias da Comarca do Morrazo (AFAMO), a Asociación de Familiares de Enfermos de Alzhéimer e outras Demencias de Galicia (AFAGA) e a Asociación de Familiares de Enfermos con Alzhéimer (AFASAL).
