Participaron máis de 700 persoas nas visitas teatralizadas, 120 nenos e nenas nos contacontos e o xogo de escapismo tivo unha moi alta ocupación
En total, preto de 3.200 persoas visitaron o Castelo de Soutomaior nos mes de decembro e 1.000 ao de Sobroso, chegando a un total de 55.000 visitantes algo longo do 2024 entre ambos espazos provinciais
O presidente da Deputación de Pontevedra, Luis López, celebrou hoxe o éxito das actividades programadas no Castelo de Soutomaior polo Nadal. Unhas actividades “pensadas para que toda a familia puidera desfrutar dun espazo único e cunha iluminación festiva moi especial”, como lembrou López, e que demostran que os castelos “son dos elementos de atracción máis importantes da provincia”.
Desta maneira, o presidente provincial detallou que as visitas teatralizadas foron, un ano máis, “unha das actividades estrela, que esgotaron absolutamente todas as prazas par asistir en todas as quendas” o que se traduciu nunha asistencia de 720 persoas nos 24 pases programados. Ademais, os contacontos “Un ratiño na cidade” e “Unha carta para os Reis Magos”, tamén completaron as súas prazas, o que suma outras 120 persoas que se achegaron ao Castelo de Soutomaior para vivir a maxia do Nadal. Por outra banda, Luis López mostrouse “moi satisfeito” co resultado do xogo de escapismo, que aínda está en marcha e rematará coas últimas quendas previstas esta fin de semana, para as que están xa esgotadas as entradas. Desta maneira, o escape room no que se recreou o asalto ao Castelo do século XV tivo tamén unha moi alta ocupación.
Estas cifras únense ás preto de 3.200 persoas que visitaron o Castelo de Soutomaior en decembro, das que unhas 2.000 acudiron aos xardíns para desfrutar da iluminación e do espectáculo de videomapping proxectado na Torre da Homenaxe, e ás preto de 1.000 persoas que se achegaron neste mes a descubrir as marabillas do Castelo de Sobroso. En total, entre ambos castelos recibiron a preto de 55.000 visitantes ao longo de todo o ano 2024.
O presidente provincial lembrou que estes son “só os datos que podemos medir a través da compra de entradas, polo que están excluídos os datos das persoas que só visitaron os xardíns; isto é, que en realidade son moitas visitantes máis”. O gran éxito de ambos espazos históricos leva a Deputación a seguir “dando pasos para convertelos en bastións dun turismo de calidade e desestacionalizado, con propostas, entre outras, como a posta en marcha das visitas tetralizadas en Sobroso, que comezarán este mesmo ano”.
