O alcalde, o fundador e o coordinador da escola e o delegado de Deportes da Xunta presentaron esta mañá o torneo, co lema “Nin un só neno sen poder facer deporte”
O torneo réndelle homenaxe a “un home altruísta, que foi emblema de voluntariado e sempre se preocupou pola xuventude”
O campo do Seixo, en Santa Cruz de Arrabaldo, acollerá mañá, sábado o IV Memorial Secundino Basalo de fútbol alevín, que organiza a Escola Deportiva Secundino Basalo co lema “Nin un só neno sen poder facer deporte”. Esta mañá, no salón de plenos do Concello, tivo lugar a presentación do torneo na que participaron o alcalde de Ourense, Gonzalo Pérez Jácome, o fundador da escola, Arturo Rodríguez, o coordinador deportivo, José Manuel Pico e o delegado de Deportes da Xunta de Galicia en Ourense, Manuel Pérez
O torneo regresa en 2022 logo do parón motivado pola pandemia e contará coa participación de 16 equipos, o sábado, 24 de setembro desde as 9.30 até as 20.30 horas, cunha primeira fase con dous grupos de 4 equipos cada un, e unha segunda fase posterior.
O alcalde destacou que “é un pracer presentar este evento”, destacando o acertado do lema: “nin un só neno sen poder facer deporte”. O fundador da escola, Arturo Rodríguez, lembrou que “a xente en Ourense relacionada co fútbol coñece ben a Secundino Basalo, un home que foi un emblema de voluntariado, que sempre se preocupou pola xuventude da Carballeira e de todo Ourense, unha persoa altruísta. Seguimos coa súa filosofía de non cobrarlles nada aos nenos nin as nenas para manter o legado de Secundino os anos que poidamos”.