A Policía Local supervisou a pasada semana 2.870 vehículos tanto turismos como taxis, autobuses e mercadorías.
O Concello de Pontevedra, en colaboración coa Dirección xeral de tráfico, vén de facer unha campaña de control dos cinturóns de seguridade e outros sistemas de retención nos vehículos co resultado de nove denuncias tramitadas de 2.870 controis realizados. Ao tempo que xestionaban a campaña, os axentes tamén controlaron o uso dos dispositivos móbiles e de consumo de sustancias estupefacientes co resultado de 27 denuncias por uso do móbil e 6 por dar positivo en drogas.
Ao respecto da campaña de control do cinto, a Policía Local púxoa en marcha a pasada semana entre o 11 e o 17 de marzo e realizou 2.870 controis a vehículos supervisando os sistemas de retención de todas as persoas que viaxaban.
Fixeron 2.5901 controis en turismos, dos cales soamente un conductor non empregaba o cinturón de seguridade; en 211 vehículos de mercadorías, soamente un non levaba o cinto posto; e os 38 taxis e 30 autobuses supervisados, todos cumprían a normativa.
O control estendeuse aos asentos dos pasaxeiros, tanto dianteiros como traseiros. No caso dos asentos dianteiros controláronse a 800 persoas: 746 que viaxaban en turismo levaban cinto e 5 non; en autobuses tramitouse unha denuncia, e ningunha taxis (9 persoas viaxaban en asento dianteiro) nin en vehículos de mercadorías (39).
No caso dos asentos traseiros, non se tramitou ningunha denuncia das 265 persoas que viaxaban neles, en concreto: 242 en turismo, 3 en taxis e 20 en vehículos de mercadorías.
En relación aos sistemas de retención infantil adaptados a talla e peso dos cativos, controláronse 137 colocados en asentos dianteiros e traseiros de turismos. Soamente se tramitou unha denuncia por non empregar un asiento homologado nun asiento traseiro dun turismo.
A concelleira de Seguridade Cidadá, Eva Vilaverde quere facer fincapé na importancia destas campañas para concienciar aos condutores e usuarios de vehículos no uso destes elementos de retención. Recorda, como se pode comprobar polos datos da campaña, que está moi interiorizado o uso dos cinturóns de seguridade e dos elementos de retención pola grande maioría dos condutores, pero lembra que segue a ser preocupante o uso do teléfono móbil en lugar de aparellos de conexión.
