O luns, o delegado de Urbanismo, Manuel Santos, irá desgranando a evolución desta obra, que suporá a creación da infraestrutura cultural que tanto merece a nosa vila para poder ter unha programación escénica máis ambiciosa.
As obras de construción do Centro Socio Cultural de Marín seguen o seu curso, despois de que arrancasen os traballos no mes de outubro e tras o parón asociado ás vacacións de Nadal.
Desde o Goberno local, a alcaldesa, María Ramallo, convocou unha xunta de portavoces para este luns, co obxectivo de ir trasladando as novidades da obra e do proxecto aos portavoces dos distintos grupos políticos, dado que se trata dunha obra de gran envergadura, que compete ao interese xeral da cidadanía e cuxo proxecto no seu día foi aprobado polo Pleno da Corporación.
Precisamente, esta xunta vén marcada polas preguntas que se realizaron na última sesión plenaria, a raíz das novidades que van aparecendo na execución da obra, algo co que tanto a dirección técnica como facultativa xa están supervisando con intensidade.
“Sabemos que os inicios dunha obra desta envergadura, especialmente en terreo portuario, son complexos, pero o noso obxectivo e a nosa estratexia é traballar con rigor, da man dos técnicos e expertos para ir resolvendo as dificultades que poidan aparecer e tomando as decisións máis acertadas”, asegurou a rexedora, María Ramallo.
Así, será o concelleiro de Urbanismo, Manuel Santos, o que lle dea traslado aos portavoces toda a información pertinente sobre a evolución da obra e os seguintes pasos a dar.
