O alumnado de Economía e Emprendemento, asistiu a unha visita guiada polo interior da lonxa de Baiona. Alí foron recibidos por José M. Sotelo, un dos responsables da lonxa, Joaquín López, concelleiro de Pesca e Nuria Leyenda, concelleira de Educación.
Durante a visita explicouse a importancia da pesca extractiva da vila de Baiona, tanto para a praza de abastos da localidade como para os supermercados e peixarías, onde se vende un produto de excelente calidade e que xera un volume de negocios superior aos 3 millóns de euros. Ademais, o alumnado tamén puido observar algunhas das especies capturadas ao longo desa xornada, que ían ser postas á venda a particulares e/o empresas.
A continuación, o alumnado e profesorado, acompañados polos responsables políticos do Concello de Baiona, acudiron á praza de abastos para atender ás explicacións sobre como saen a concurso os diversos postos de venda, así como as condicións que deben reunir os interesados en vender os seus produtos dentro deste espazo público.
O alumnado, desta maneira, puido comprobar que se trata dun espazo amplamente atractivo para o desenvolvemento da actividade económica.
O Concello de Baiona aplaude e apoia iniciativas como a visita do alumnado de Economía e Emprendemento do CPI de Cova Terreña á lonxa e a praza de abastos da vila. Estas experiencias educativas non só enriquecen o coñecemento dos nosos mozos sobre os motores económicos locais, senón que tamén fomentan o vínculo entre a comunidade escolar e os sectores produtivos do noso municipio.