“Non parece lóxico que pague o mesmo pola ludoteca de verán unha familia que ten dificultades para chegar a final de mes e precisa o servizo para poder conciliar que outra que gañe 100.000€ ao ano” sinalou Manuel Fariña.
O BNG propón que o Concello de Caldas aplique un sistema de baremación que teña en conta a conciliación laboral e familiar e a situación económica familiar para a adxudicación de prazas e a fixación de prezos da ludoteca de verán municipal. Así mesmo, este sistema debe contar con criterios claros e obxectivos que garantan a xustiza social tanto na adxudicación de prazas como na fixación dos prezos.
Nun contexto como o actual, con unha inflacción absolutamente disparada que está a poñer a moitas familias contra as cordas, o goberno local pretende adxudicar as prazas da ludoteca con un sistema de “sálvese quen poida” no que o único criterio para a adxudicación dunha praza sexa a orde de chegada na entrega da documentación. Por outra banda, a proposta do PSOE fixa un prezo que non ten en conta en absoluto a situación económica das familias, o que implica na práctica unha clara discriminación cara as familias que peor o están pasando nesta crise.
A ludoteca de verán é un servizo que debe buscar a conciliación laboral e familiar das familias, polo que non se entendería que o PSOE tirase cara adiante coa súa proposta sen atender a estes criterios mínimos de xustiza social.
“A conciliación laboral e familiar dos caldenses non pode depender dunha carreira de velocidade para ver quen presenta antes a solicitude” afirmou Fariña.