- Os talleres tratarán sobre a arte, a risa, ou a música e a palabra como ferramentas para sentirse mellor
- As mulleres interesadas deberán inscribirse de balde no Centro de Información ás Mulleres ou no correo cim@concellodebueu.gal
O Concello de Bueu, a través do Centro de Información ás Mulleres (CIM), organiza tres obradoiros para fomentar o benestar e a autoestima das mulleres. Dirixido a maiores de idade, cada unha poderá escoller a proposta que máis lle interese. Así, o 6 de novembro comezará o de “A arte como ferramenta de expresión”, que busca empregar a arte como medio de autocoñecemento, expresión emocional e fortalecemento persoal, e que se celebrará os xoves 6, 13, 20 e 27 de novembro e 4 e 11 de decembro, en horarios de 11.30 a 13.00 horas nas dependencias do CIM.
A outra é “A música e a palabra para o benestar”, un obradoiro vivencial dirixido a mulleres no que a música e a palabra se converten en ferramentas de expresión, autocoñecemento e empoderamento. Desenvolverase os xoves 15, 22 e 29 de xaneiro, e 5, 12 e 19 de febreiro, no mesmo horario.
A última das propostas é “Rir para vivir: a risa como camiño de benestar”, un taller para as que desexan mellorar o seu benestar emocional a través da risa, o xogo e a creatividade. Este terá lugar os xoves 5, 12, 19 e 26 de marzo, e 2 e 9 de abril.
As persoas que desexen participar deberán inscribirse previamente nas dependencias do CIM ou ben cubrindo a solicitude e enviándoa ao enderezo electrónico cim@concellodebueu.gal. Os talleres son de balde e con prazas reducidas, polo que as mulleres que se anoten deberán elixir e só poderán facelo nunha das propostas.
A actividade conta cos fondos do Pacto de Estado Contra a Violencia de Xénero.
