• Isabel Couselo propón “un casco histórico aberto, cheo de vida, non un pobo pantasma, con macetas de quita e pon o fin de semana, que é o que temos nos últimos catro anos”.
• Será unha das prioridades do Partido Popular e que incluirán no programa electoral.
O Partido Popular de Cuntis aposta por “un casco histórico aberto, cheo de vida, non un pobo pantasma, con macetas de quita e pon o fin de semana, que é o que temos nos últimos catro anos”.
A candidata á alcaldía, Isabel Couselo, afirma que “será unha das prioridades do Partido Popular e que incluirán no programa electoral para os vindeiros catro anos”, tal e como xa anunciou no último pleno que se celebrou no Concello de Cuntis, no que a popular se desmarcou da postura do resto dos grupos políticos, que queren o peche total do casco antigo.
Couselo aposta por “unha zona de coexistencia para o casco histórico, na que convivan persoas e vehículos. As persoas terán preferencia e os vehículos son os que teñen que adaptarse. Propoñen velocidade máxima 10 km/h e incorporar sinalización e demais medidas que garantan a seguridade das persoas”.
Para o Partido Popular “conservar e potenciar o casco antigo de Cuntis non se consegue con sacar os coches do medio, se consegue con planificación e con proxección de futuro”. Nesta liña, propoñen “dinamizar o tecido produtivo e económico de Cuntis, incentivar o consumo na zona, que abran mais locais, ao contrario do que aconteceu nos últimos catro anos, coa política do Goberno socialista”.