Co novo formato o espectáculo poderá contar con artistas de Europa, América e Asia compartindo escenario co folclore galego os día 26 e 27 de xullo no Parque da Feira Vella
O parque da Feira Vella de Ponteareas prepárase para vivir, os días 26 e 27 de xullo, unha das propostas máis vibrantes do ano, coa chegada da XII edición do Festival Internacional Algazara “Danzando entre Culturas”, organizado pola Agrupación Folclórica Algazara e contando coa colaboración do concello de Ponteareas.
Este evento, consolidado como un referente de irmandade e intercambio cultural na provincia de Pontevedra, presenta este ano unha gran novidade: por primeira vez na súa traxectoria, expande a súa duración a dúas xornadas consecutivas, multiplicando a súa oferta artística e o número de países participantes, contando nesta ocasión cun total de seis delegacións internacionais procedentes de Europa, América e Asia.
O evento, que foi presentado no concello, contou coa presenza do vicepresidente da agrupación, Iván Álvarez, acompañado por outros membros da agrupación; co concelleiro de Cultura, Juan Carlos González, e a alcaldesa da localidade, Nava Castro.
Iván Álvarez puxo de manifesto que a ampliación a dous días é unha demanda crecente do público e ao prestixio internacional que o festival foi gañando ano tras ano”. O vicepresidente engadiu que “Danzando entre Culturas” non é só un espectáculo visual; “é un espazo de convivencia onde os pobos se comunican sen barreiras idiomáticas, utilizando a danza como linguaxe universal”. O concelleiro de cultura, Juan Carlos González, enxalzou o traballo realizado por Algazara “para preservar a identidade cultural dos pobos, manter viva a memoria colectiva e estreitar lazos a través da música e a danza tradicional”.
Pola súa banda, a alcaldesa, Nava Castro, ademáis de felicitar a Agrupación Folclórica Algazara, puxo de manifesto a relevancia do evento, que converte a Ponteareas “no epicentro da danza e a diversidade, ademais de ser unha ferramenta indispensable para “abrir as portas do municipio ao mundo, unindo diferentes culturas nun mesmo escenario”. A alcaldesa remarcou que o respaldo do Concello á Agrupación Algazara non é só institucional, senón unha aposta firme, cun dos eventos culturais máis destacados do verán, “por traer a cor e o folclore dos diferentes recunchos do planeta de forma totalmente gratuíta” para os veciños e as veciñas.
Programa
A Agrupación Folclórica Algazara, deseñou un programa ambicioso que divide ás delegacións internacionais en dúas galas diferenciadas, garantindo un espectáculo dinámico e cheo de contrastes en cada xornada. Con hora de comezo ás 22.00 horas, a primeira noite, a do domingo, terá lugar a gala de apertura e estará marcada pola elegancia e o misticismo dos bailes tradicionais de Letonia, que traerán a esencia do norte de Europa. O continente americano tomará a vez coa forza dos ritmos andinos do Perú e o colorido folclore costeiro de Ecuador, dous países cun patrimonio dancístico de enorme riqueza.
A Gala de Clausura, a do luns 27, contará coa espectacularidade exótica de Indonesia, cuxos bailes rituais e traxes cerimoniais prometen fascinar ao público. O festival mirará cara ao Cono Sur coa enerxía e a tradición gaucha de Arxentina e a elegancia das danzas típicas de Chile. Como nexo de unión desta gran festa da diversidade, a propia Agrupación Folclórica Algazara actuará nas dúas xornadas. Os anfitrións exercerán de embaixadores da cultura galega, presentando un repertorio de música tradicional que poñerá en valor a identidade local ante as delegacións estranxeiras.
A Agrupación Folclórica Algazara naceu en 1997 co obxectivo de recuperar e difundir non só o folclore da nosa comarca senón de Galiza en xeral. Dende fai 26 anos leva acabo numerosas actividades como xornadas, intercambios culturais así como festivais de folclore nacionais sempre cunha ollada á transmisión e mantemento da cultura popular, música e danza. Dende 2015 organiza en colaboración co concello de Ponteareas o Festival de folclore internacional Algazara “Danzando entre Cultura
