• O alcalde Luciano Otero impulsa, xunto con Mondariz e Mondariz-Balneario, un subministro eléctrico conxunto que garante aforro e enerxía limpa
O Concello de Pazos de Borbén, da man do seu alcalde Luciano Otero, participa nun importante proxecto conxunto xunto cos concellos de Mondariz e Mondariz-Balneario, co obxectivo de avanzar cara a unha xestión máis eficiente e sostible da enerxía pública. Este acordo permitirá un aforro significativo no consumo eléctrico municipal e supón un paso firme cara á transición enerxética e ao compromiso co medio ambiente.
O convenio entre os tres concellos asinouse hai tempo, e froito dese traballo conxunto vén de rematarse o proceso de licitación compartida do subministro eléctrico, que agora se pon en marcha. Esta colaboración intermunicipal permite mellorar os prezos e condicións do contrato, beneficiando así ás administracións locais e, sobre todo, á veciñanza.
Este novo contrato, desenvolvido coa colaboración da empresa Energysave
Projects S.L., garante que o 100 % da electricidade subministrada proceda de fontes renovables ou de coxeneración de alto rendemento, segundo a normativa europea vixente. Ademais, sen custo engadido para os concellos, disporase dunha batería virtual para compensar os excedentes do autoconsumo fotovoltaico.
O alcalde Luciano Otero destacou:“Este é o resultado dunha colaboración intelixente entre concellos que compartimos obxectivos comúns. Apostamos por un modelo sostible, reducindo o gasto e coidando do planeta que queremos deixar ás novas xeracións.”
Deste xeito, Pazos de Borbén continúa coa súa liña de accións dirixidas a mellorar a calidade de vida da veciñanza, reforzando o compromiso coa sustentabilidade e a innovación na xestión municipal.
