O “Clutch Basketball Camp” reúne a novos talentos de toda Galicia do 19 ao 25 de xullo
Ponteareas prepárase para acoller un dos eventos formativos máis esperados e ambiciosos do verán no panorama do baloncesto galego. Do próximo 19 ao 25 de xullo, o municipio transformarase na sede oficial do “Clutch Basketball Camp”, contando coa colaboración do concello de Ponteareas e o CB Condado. Un programa de tecnificación de alto rendemento deseñado especificamente para mozos e mozas nacidos entre os anos 2009 e 2017 que buscan dar un salto cualitativo no seu xogo.
O evento, que utilizará as instalacións do CEIP Plurilingüe Ramiro Sabell Mosquera, do CEIP Fermín Bouza Brey, do IES Barral, do IES Val do Tea e do Complexo Deportivo Álvaro Pino, foi presentado no concello de Ponteareas, coa presenza do concelleiro de Deportes, Nico Rodríguez; o tenente de alcaldesa, Juan Carlos González, A alcaldesa de Ponteareas, Nava Castro, así como os directores do evento, Xoel Folgueiras e Diego Gómez.
Nico Rodríguez mostrou o seu agradecemento aos organizadores “por elixir Ponteareas para un evento de tanta relevancia”, á vez que Juan Carlos Carrera destacou as completas instalacións deportivas locais, “que fan viable un evento con diferentes puntos de actividade”. Pola súa banda, a alcaldesa, Nava Castro, puxo de manifesto que o evento non só impulsa o talento da canteira do noroeste peninsular, senón que “dinamiza a actividade social, comercial e deportiva de Ponteareas”. Pola súa banda, os organizadores mostraron o seu “agradecemento” polo apoio recibido así como pola “acollida que tivo o campus”.
O obxectivo principal do campus non é só a ocupación do tempo de lecer, senón ofrecer unha semana de inmersión total no baloncesto profesional. Os adestramentos centraranse na mellora da técnica individual, a optimización da toma de decisións en situacións reais de partido e o desenvolvemento da mentalidade competitiva baixo presión.
Corpo técnico de elite
O gran atractivo do campus radica na calidade do seu profesorado, integrado por profesionais en activo das ligas nacionais e as seleccións españolas. O evento contará coa presenza de Unai Mendikote, xogador profesional do “HLA Alacante” na liga FEB e internacional absoluto coa Selección de España de 3×3, quen exercerá como padriño de honra, impartindo sesións maxistrais e compartindo a súa experiencia no profesionalismo cos canteiráns.
Xunto a el, a pista contará coa dirección de Andrea Pérez, recente campioa de España na modalidade de 3×3 e adestradora oficial da Selección Española. O resto do staff compóñeno técnicos de contrastada traxectoria no baloncesto formativo da comunidade autónoma, como Roi Vega, Alberto Estévez, Sergio González, Xavi Simón e Gonzalo García.
Coidado integral
A saúde mental e a xestión das emocións no deporte formativo serán un piar fundamental grazas á participación activa de Álex Bouzo, psicólogo deportivo con experiencia no fútbol base do RC Deportivo da Coruña e técnico do CB Condado.
Así mesmo, a área física estará monitorizada de cercado polo preparador David Pérez, complementado cun servizo de fisioterapia deportiva permanente a cargo de Nacho Galindo para a prevención e tratamento de sobrecargas. A alimentación e o rendemento tamén se coidaron ao detalle: grazas a unha alianza estratéxica, Eurobanan Galicia proverá diariamente froita fresca e snacks saudables aos deportistas, combinando estas pautas coa suplementación da firma especializada Crown Sport Nutrition.
