• Jorge Cubela: “os veciños deste lugar non teñen que ser castigados por vivir no rural, deben garantirse infraestruturas e servizos que contribúan a fixar poboación e para que vivir nas parroquias non sexa un problema”.
• Miguel Domínguez denuncia que “é posible que sexa a estrada en peor estado de conservación de toda a provincia”.
O grupo provincial do Partido Popular reclama á Deputación de Pontevedra que actúe na estrada provincial EP-5206, no acceso a Luneda, na Cañiza. O deputado e voceiro local do partido, Miguel Domínguez, recorda que xa no pleno provincial do mes de febreiro reclamou ao Goberno información “sobre o estado lamentable e deterioro” desta estrada.
“É posible que sexa a estrada en peor estado de conservación de toda a provincia”, denuncia o popular, que lamenta que “é unha vergonza que a día de hoxe continúen sen contestar ao rogo feito polo PP e que non se comprometan de unha vez a arranxala”.
Para o voceiro do grupo, Jorge Cubela, é probable que esta estrada non ten as ratios de usuarios das estradas nas grandes cidades, “pero é o acceso que utilizan cada día os veciños deste lugar, e non teñen que ser castigados por vivir no rural. Todo o contrario, deben garantirse desde as institucións, neste caso desde a Deputación de Pontevedra, infraestruturas e servizos que contribúan a fixar poboación no rural da nosa provincia, para que vivir nestas parroquias non sexa un problema”.
Nesta mesma liña incidiu Domínguez, que reclamou que “os veciños de Luneda teñen o mesmo dereito que outros núcleos de poboación, como por exemplo Vigo, a ter unhas estradas en condicións boas para circular con seguridade. Por iso esiximos estradas niqueladas tamén na Cañiza”.
