Manuel Baltar visitou a aula Cemit -que conta con financiación do goberno provincial- e reuniuse co alcalde, José Manuel Rodríguez, garantíndolle a máxima implicación: “Cenlle seguirá contando cun aliado fundamental para o seu desenvolvemento como é a Deputación”
Con cargo á modificación de créditos que se aprobará no pleno ordinario de abril, a Deputación cooperará no abastecemento e saneamento de Trasariz; na axuda para o bombeo en alta de Razamonde-San Trocado; e axudará na expropiación de terreos para ampliar a área termal
O presidente da Deputación de Ourense, Manuel Baltar, realizou hoxe unha visita institucional a Cenlle, onde visitou a aula do Centro para a Modernización e Inclusión Tecnolóxica (Cemit) -proxecto que conta con apoio do goberno provincial- e mantivo unha reunión de traballo co alcalde, José Manuel Rodríguez, para analizar as liñas de colaboración actuais e futuras entre ambas administracións en materia de infraestruturas, servizos e maila ampliación da área termal do municipio. Un encontro que, segundo afirmou Manuel Baltar, garante a Cenlle “que seguirá contando cun aliado fundamental para o seu desenvolvemento como é a Deputación de Ourense”.
Acompañado por César Fernández, vicepresidente da institución provincial e delegado para asuntos de cooperación cos concellos do Ribeiro, Manuel Baltar asegurou que “a Deputación seguirá colaborando en proxectos de infraestruturas, culturais, turísticos e dinamizadores do medio rural, tanto no presente como no futuro”, cualificando a este municipio como “unha das mellores postais da provincia, por natureza, recursos endóxenos como o viño e termalismo”.
Trala sinatura do presidente provincial no libro de honra do Concello, o alcalde, José Manuel Rodríguez, agradeceu a visita de Manuel Baltar a Cenlle, así como a súa disposición a participar nos proxectos que lle formulan: “Contamos como sempre coa súa colaboración”, dixo.
Proxectos con apoio da Deputación en Cenlle
Na actualidade, a Deputación de Ourense está a colaborar co Concello de Cenlle na aula do Cemit; nas obras da estrada que une Cuñas con San Lorenzo da Pena, pertencentes ao plan provincial do pasado ano; e noutro proxecto de saneamento dun pobo de Cenlle.
Ademais, e con cargo á modificación de créditos que se aprobará no pleno ordinario do mes de abril, a Deputación cooperará no abastecemento e saneamento de Trasariz; concederá unha axuda para o bombeo en alta de Razamonde-San Trocado, do que participan ademais de Cenlle os municipios de Punxín e San Amaro; e tamén axudará á expropiación de terreos para ampliar a área termal deste municipio do Ribeiro.
