A deputada de Infraestruturas Públicas e Mobilidade, Belén Cachafeiro, percorreu xunto co alcalde de Vilanova de Arousa, Gonzalo Durán, e o concelleiro e tamén deputado provincial, Javier Tourís, o tramo no que se está a desenvolver a actuación que conta cun investimento de 120.000 euros
A deputada de Infraestruturas Públicas e Mobilidade, Belén Cachafeiro, supervisou xunto co alcalde de Vilanova de Arousa, Gonzalo Durán, e o concelleiro e tamén deputado provincial, Javier Tourís, as obras de mellora peonil e drenaxe na estrada provincial EP-9702 As Sinas-Vilanova de Arousa. Trátase dunha actuación que abrangue dous tramos cunha lonxitude total de máis de 700 metros nos que se está a investir 120.000 euros.
Tal e como recordou Cachafeiro, o obxectivo principal deste proxecto é “mellorar a accesibilidade, as condicións de tránsito e mobilidade peonil e a drenaxe nesta estrada que une As Sinas e Vilanova de Arousa, asegurando unha integración harmónica coa contorna na que se sitúa”. Deste xeito, estase a actuar en dúas zonas: nun primeiro tramo entre os puntos quilométricos 0+800 e 1+280, cunha lonxitude total de 480 metros, e noutro situado entre os puntos quilométricos 2+750 e o 3+000, cunha lonxitude de 250 metros.
Coas obras que está a acometer a Deputación nesta estrada provincial, tal e como subliñou a deputada, “estanse arranxar e solucionar os importantes problemas relacionados coas augas pluviais e a drenaxe existentes”. Deste xeito, no primeiro tramo levaranse a cabo obras de mellora da seguridade viaria mediante a execución de cunetas que permiten tanto mellorar a evacuación das augas pluviais, como tamén configurar un espazo para que o condutor poida reconducir a súa traxectoria no caso se saída da calzada en un lugar transitable para os peóns. No que respecta ao segundo tramo, trátase de mellorar as condicións de accesibilidade.
