Este pasado xoves 31 de xullo celebrouse un pleno municipal en Meaño no que se aprobaron catro mocións presentadas e defendidas polo BNG, aínda que con distintos niveis de apoio das demais forzas políticas:
* Repulsa ao xenocidio do pobo palestino.
O BNG defendeu con firmeza unha moción de condena ao xenocidio en Palestina, que suscitou críticas por parte do PP e Meaño Independiente. Aínda así, logrou avanzar grazas ao voto favorable do BNG e a sorprendente abstención das outras dúas formacións
* Benestar animal:
A moción para instaurar a Lei de Benestar Animal no concello aprobouse por unanimidade, aínda que non sen debate. A concelleira do BNG deixou claro que “os cans e gatos sen dono teñen un responsable: o concello, que debe asumir o seu coidado”.
* Demanda dunha segunda ambulancia medicalizada para o Salnés.
Esta foi a moción con maior consenso, aprobándose sen debate relevante e por unanimidade. O Pleno de Meaño demanda unha segunda ambulancia na comarca, e oponse a que se quite do hospital do Salnés.
* Moción de urxencia polos lumes: moratoria do eucalipto, prevención de incendios e medios de extinción.
O BNG levou a debate unha moción de urxencia tras os devastadores incendios que queimaron máis de 70 hectáreas no concello de Meaño esta semana. A formación nacionalista esixiu un cambio no modelo forestal colonial, defendendo unha moratoria indefinida das plantacións de eucalipto para romper co monocultivo actual e comprometendo ao goberno municipal a crear políticas activas de prevención, sensibilización e posta en valor do monte veciñal e comunal, en colaboración cos axentes sociais e ambientais da zona.
Aínda que o alcalde se opuxo a esta medida, argumentando que “ten que haber de todo no monte”, a concelleira do BNG, Rosana Domínguez recordoulle que “o que hai é un dominio do eucalipto, non diversidade”. A moción aprobouse co único voto favorable do BNG e a abstención do PP e Meaño Independiente.
Un pleno marcado pola tensión e a firmeza do BNG
O BNG de Meaño foi a forza que liderou o debate, ocupando a maior parte do tempo na defensa das súas propostas. A formación nacionalista mostra a súa satisfacción pola aprobación das súas mocións, pero destaca as abstencións do PP e de Meaño independente, tanto a hora de buscar políticas efectivas para acabar cos lumes, como coa mostra da solidariedade internacional co pobo palestino, manténdose cunha pasividade inexplicable ante o xenocidio televisado dun pobo enteiro.
Por último a concelleira do BNG presentou varias preguntas para que a alcaldía dese resposta a temas importantes como son os postos que aínda están sen cubrir no cadro de persoal. O auxiliar administrativo e os operarios encargados para diferentes tarefas diarias seguen centrando o debate dos últimos plenos. Tamén preguntou sobre o mal estado no que se encontraba o entorno onde a Asociación Cultural Penaguda organiza o seu tradicional festival a finais de Xullo. Por outra banda, o BNG esixiu a información que solicitou por rexistro sobre a Festa do Verán que se organizou en Dena.
O BNG critica, que nesta parte dos plenos ordinarios, onde se da resposta ás diferentes demandas da veciñanza, o alcalde empregue de maneira reiterada a evasiva e a pouca transparencia nas súas respostas ás cuestións que se presentan, dificultando así, o traballo da oposición.
