• O líder do PP asegura que o barrio necesita un Goberno local “comprometido, disposto e áxil” á hora de executar actuacións que melloren a calidade de vida dos veciños
• O dirixente popular lamenta que o BNG de Lores permitise que “Campolongo se quedase atrás” en seguridade, limpeza, iluminación, mantemento de parcelas municipais ou dos espazos públicos
O candidato e portavoz municipal do Partido Popular de Pontevedra, Rafa Domínguez, realizou un paseo por Campolongo, acompañado por representantes da Federación de Asociacións de Veciños Castelao e os concelleiros do grupo municipal Martín Martínez, Bea Rey e Iago Acuña, para coñecer de primeira man as principais necesidades do barrio e recoller as propostas expostas polos veciños para dar un impulso á zona.
Durante o percorrido, os representantes veciñais trasladaron ao PP de Pontevedra diversas demandas relacionadas co estado dos espazos públicos, a conservación do patrimonio, a seguridade, a mobilidade urbana, a limpeza, a iluminación e o abandono de diferentes parcelas e equipamentos municipais. Unhas reivindicacións que, segundo sinalou Domínguez, “poñen de manifesto que Campolongo necesita un Goberno local comprometido, disposto e áxil á hora de executar actuacións que melloren o benestar e a calidade de vida dos veciños do barrio”.
“Unha das obsesións que ten o Partido Popular é estar coa xente e escoitar á xente. Por iso, un dos colectivos máis importantes cos que nos reunimos son as asociacións de veciños”, destacou o líder dos populares, quen insistiu en que “a mellor forma de coñecer unha cidade e os problemas reais do día a día é falar cos cidadáns, coas persoas que viven o día a día de cada rúa, barrio ou parroquia”.
Domínguez definiu a visita como “moi positiva e moi proveitosa”, xa que lles permitiu comprobar e analizar sobre o terreo diferentes situacións susceptibles de mellora e coñecer as prioridades que os propios veciños consideran máis urxentes. “Levamos moito tempo estudando posibles solucións para o barrio, pero é importante ter a visión da Federación Castelao e xuntos poder chegar a un consenso para mellorar todas as deficiencias que existen na actualidade”, afirmou.
O líder do PP de Pontevedra destacou tamén o papel que desempeñan as asociacións veciñais como interlocutores de referencia para trasladar as inquietudes da cidadanía. “As asociacións de veciños son o mellor altofalante dos barrios e a nosa obrigación é escoitalas, recoller as súas propostas e converternos nesa correa de transmisión que traslade as súas demandas ao Concello”, asegurou.
Neste sentido, Domínguez lamentou que o Goberno local do BNG “permitise que Campolongo se quedase atrás” e defendeu a necesidade de priorizar actuacións que permitan recuperar espazos degradados, mellorar o mantemento das zonas públicas e resolver problemas que afectan ao día a día dos residentes.
“No PP somos o partido máis próximo aos veciños, o que os escoita, o que pisa a rúa e o que coñece os problemas reais, porque son os propios cidadáns quen nolos traslada”, engadiu o portavoz municipal, ao mesmo tempo que lembrou que este modelo de traballo “permitiranos, para as eleccións de 2027, expor propostas axustadas ás necesidades reais de cada barrio”.
Para rematar, Domínguez destacou que, se chega á alcaldía, “será o momento de impulsar as obras, reformas e actuacións que Campolongo necesita”. “Hai deficiencias que non deberían existir a estas alturas e que merecen unha resposta por parte do Concello. Os veciños non piden grandes actuacións, queren solucións necesarias para mellorar a súa día a día, e iso é o que imos seguir defendendo desde o Partido Popular”, concluíu.
