A xornada celebrarase o 26 de setembro no Pazo de Mos e contará con música, baile, obradoiros infantís e pintacaras
O Pazo de Mos acollerá o vindeiro 26 de setembro unha nova edición da Tómbola Benéfica da AECC Mos, unha iniciativa solidaria que ten como obxectivo recadar fondos para apoiar a loita contra o cancro e a importante labor que desenvolve a Asociación Española Contra o Cancro.
A xornada dará comezo ás 12:00 horas e contará cunha ampla programación de actividades e actuacións para tódolos públicos.
O programa arrancará ás 12:00 horas coa actuación do Grupo de Gaitas “Celado”. Pola tarde, ás 17:30 horas, será a quenda da Banda de Acordeóns “O Son do Acordeón”. Ás 18:30 horas actuará a Asociación Pasión Flamenca de Vigo, mentres que ás 19:00 horas terá lugar unha exhibición de baile a cargo dos alumnos e alumnas de Patricia Martínez.
Ademais, ao longo da xornada haberá obradoiros infantís e pintacaras, para que os máis pequenos tamén poidan gozar desta celebración solidaria.
A alcaldesa de Mos, Nidia Arévalo, mostrouse “moi satisfeita de que cada ano se poida celebrar esta tómbola e de que conte sempre cunha resposta tan positiva por parte da veciñanza”. Neste sentido, destacou a importancia de manter no tempo unha iniciativa que combina solidariedade, participación cidadá e actividades para toda a familia.
Arévalo quixo tamén agradecer enormemente o traballo de tódalas persoas voluntarias que fan posible a celebración desta xornada. “Quero agradecer de corazón o enorme traballo e dedicación de tódolos voluntarios e voluntarias. A súa implicación e xenerosidade son fundamentais para que esta tómbola se celebre cada ano con tanto éxito e para que entre todos sigamos apoiando unha causa tan importante como é a loita contra o cancro”, sinalou a rexedora.
Desde a organización anímase a toda a veciñanza de Mos e dos municipios da contorna a participar nesta xornada solidaria, desfrutar das actividades programadas e colaborar cunha causa que ano tras ano conta co apoio e compromiso da cidadanía.
A iniciativa conta coa colaboración do Concello de Mos, AECC Mos, Obradoiros de Emprego de Galicia, Deputación de Pontevedra, Centro Cultural Deportivo e Fundación Pazo de Mos, entre outras entidades.
Un ano máis, Mos volverá demostrar o seu compromiso e solidariedade coa loita contra o cancro cunha xornada para compartir, desfrutar e colaborar.
