- O certame que rende homenaxe ao célebre director e compositor terá lugar ás 18:00 horas
- Participarán cinco agrupacións vocais para ofrecer un variado repertorio de música coral e potenciar a tradición polifónica local.
O Concello de Ponteareas volve vestirse de gala para albergar unha das citas culturais máis agardadas da tempada, como é o “IV Encontro de Corais Ángel Viro”. O evento terá lugar este domingo 13 de setembro ás 18:00 horas nas instalacións do Auditorio Municipal Reveriano Soutullo.
Este festival, plenamente consolidado na axenda local por cuarto ano consecutivo, rende unha especial homenaxe á figura e ao legado do mestre Ángel Viro Caamaño, compositor, histórico director da Coral Polifónica do Centro Artístico Sportivo e nomeado fillo adoptivo de Ponteareas pola súa intachable contribución ao patrimonio musical da vila.
O encontro reunirá sobre o escenario a cinco destacadas agrupacións que ofrecerán unha mostra diversa de talento vocal, estilos e xéneros. Estarán presentes a Coral Centro Artístico Sportivo, a Coral Cantares de Xinzo, a Coral Ars Cantorum de Guillade, a Coral Santa María de Areas e o Coro Gospel Singing with Soul da ESMU Vila do Corpus.
O concelleiro de Cultura, Juan Carlos González, subliñou o excelente nivel técnico do certame e a importancia do asociacionismo musical: “Con esta cuarta edición demostramos que a polifonía ponteareá está máis viva que nunca. Conseguimos reunir sobre un mesmo escenario cinco propostas diversas e de altísima calidade que fan que o noso auditorio sexa o epicentro cultural da comarca este domingo”.
Pola súa banda, a alcaldesa de Ponteareas, Nava Castro, destacou o valor emocional e identitario que supón este festival para o municipio: “Este encontro non só é unha homenaxe máis que merecida ao mestre Ángel Viro, senón tamén un reflexo vivo do orgullo que sentimos pola nosa música”. Ponteareas sempre foi “unha terra de grandes voces e de profunda tradición cultural; apoiar o talento dos nosos veciños e veciñas e manter vivo o legado musical é unha prioridade para este goberno”, engadiu a rexedora.
Dende o Concello convídase a toda a cidadanía e aos amantes da música a sumarse a esta gran tarde festiva. A entrada será de balde ata completar a capacidade do auditorio.
