Para formar parte da rede de voluntariado de COGAMI hai que ser maior de 16 anos e cumprir cos requisitos de solidariedade, altruísmo, compromiso e ter motivación.
A rede de voluntariado de COGAMI inicia en 2001 para canalizar todos os proxectos de voluntariado que se desenvolven, destacando programas como o de acompañamento e apoio a persoas con discapacidade dentro e fóra do domicilio, apoio educativo a estudantes que precisan de reforzo nalgunha materia, apoio nas charlas de sensibilización sobre a discapacidade, na atención ás persoas que realizan natación terapéutica, na práctica de actividades de lecer, entre outros.
Para mellorar esta rede de voluntariado, que arestora supera o milleiro de persoas inscritas, dende COGAMI estanse a desenvolver diferentes programas, a maioría cofinanciados pola Xunta de Galicia a través da Consellería de Política Social, como a Dirección Xeral de Xuventude, Participación e Voluntariado, entre outras.
Sumando na Rede é un dos programas específicos que desenvolve o servizo de voluntariado de COGAMI. Consiste no desenvolvemento de actividades de sensibilización que teñen por finalidade fomentar a participación de persoas con discapacidade como persoas voluntarias. Levan participado unha media de 200 persoas voluntarias en todos os programas durante este ano.
Formación dirixida ás novas incorporacións de persoas voluntarias é outra das accións que se realizan. Antes de que a persoa entre a formar parte da bolsa de voluntariado, recibe formación inicial de xeito presencial pero, dende que convivimos coa pandemia, estas actividades estanse a implementar tanto presenciais como a distancia en función da situación vinculada ao COVID-19. No que vai de ano recibiron 29 persoas formación en voluntariado.
COGAMI ofrece tamén formación especializada dirixida a persoal que xestiona programas de voluntariado nas distintas entidades que forman parte da Confederación. Este ano 2021, por mor do COVID-19, realizouse unha formación cunha duración de 60 horas de Xestión de Voluntariado Especializado en Programas do Terceiro Sector da Discapacidade e a este asistiron un total de 12 persoas.
O voluntariado tamén participa na realización charlas de sensibilización, concienciación e prevención de lesións medulares que COGAMI dirixe ao conxunto da poboación, sobre todo, a escolares nos centros educativos. A participación das persoas voluntarias consiste en contar as súas propias vivencias. Un total de 565 persoas asistiron a estas charlas que foron impartidas durante este ano e que se retoman a partir deste mes de setembro.
