1500 veciños e veciñas continúan sen ter médico/médica asignada
A Valedora do Pobo manifestou o seu compromiso de iniciar unha investigación para estudar a denuncia presentada polo BNG a respeito da situación crítica que sofre a atención primaria no concello de Poio. Este compromiso produciuse despois dunha reunión con representantes do BNG do concello de Poio, onde se puxo en coñecemento as consecuencias para a veciñanza de non cubrir de forma permanente unha praza que atende a 1500 pacientes (facultativa que cubre os centros de saúde de Anafáns e Combarro).
Compre lembrar que na actualidade conta cun médico para atender a 1500 persoas de dous
cupos que se amortizaron nunha soa praza hai xa varios anos. A principios do presente ano, a facultativa que atendía os centros de Anafáns e Combarro trasladouse a outro municipio, e o SERGAS non cubríu a praza, provocando listas de agarda de máis de vinte días para unha cita médica.
Na actualidade, pois, 1500 veciños e veciñas seguen sen ter médico asignado e sen poder acceder a atención médica; as listas de agarda sobrepasan os vinte días, os cupos están
desbordados e a escaseza de persoal sanitario é manifesta, unha situación que a responsábel nacionalista, Marga Caldas, non dubida en calificar de “vulneración do dereito protección da saúde das persoas”.
“Dende o BNG presentaremos un documento no que se defenderá o dereito á protección da
saúde e a unha atención sanitaria digna, demandando a cobertura do persoal de maneira
permanente e estábel”, afirmou a responsábel local nacionalista, ao tempo que manifestou a súa esperanza de que o proceso de investigación aberto pola Valedora do Pobo serva como primeiro aviso á Xunta de Galiza, para que cumpra dunha vez por todas coa súa obriga de garantir unha atención sanitaria digna para todos os veciños e veciñas de Poio
