A través deste plan distribuíronse xa máis de 1,8 millóns de euros entre 30 concellos da provincia de menos de 50.000 habitantes
A Deputación de Pontevedra acaba de aprobar unha nova axuda de 13.000 euros ao abeiro do Plan Extraordinario de Infraestruturas Deportivas, dotado con 4 millóns de euros, para o Concello da Illa de Arousa. O Goberno local pretende dedicar a totalidade deste investimento a adquirir mobiliario deportivo para equipar o ximnasio municipal, situado no Edificio de Usos Náutico-Deportivo, no Bao,
Desta maneira, o Concello da Illa de Arousa dedicará esta achega de 13.049 euros a esta infraestrutura deportiva na que se exercitan tanto os deportistas dos clubs municipais como os veciños do concello. Así, adquiriranse aparellos como unha cinta de correr, un rack (gaiola de ximnasio) e os seus accesorios, unha maquina de fondos e dominadas asistidas, unha prensa inclinada ou jaca, un hip thrust (para exercicios de glúteos) e unha última de abdutor e adutor. Ademais, instalarase un solo en azulexo en caucho negro.
O Plan Extraordinario de Infraestruturas Deportivas da Deputación, dirixido aos 59 concellos da provincia de menos de 50.000 habitantes, mobilizou ata o momento máis de 1,8 dos 4 millóns de euros orzamento total, con achegas, ademais de para A Illa de Arousa para A Cañiza, A Estrada, A Lama, Arbo, As Neves, Baiona, Barro, Cangas, Catoira, Cerdedo-Cotobade, Covelo, Crecente, Fornelos de Montes, Gondomar, Marín, Meis, Mondariz-Balneario, Moraña, O Rosal, Oia, Pazos de Borbén, Poio, Redondela, Salceda de Caselas, Salvaterra de Miño, Valga, Vilaboa e Vilagarcía de Arousa.