Estes recursos enmárcanse no Plan Extraordinario de Infraestruturas Deportivas que xa mobilizou máis de 1,7 millóns de euros entre 28 concellos da provincia de menos de 50.000 habitantes
A Deputación de Pontevedra acaba de aprobar unha nova axuda de preto de algo máis de 32.000 euros ao abeiro do Plan Extraordinario de Infraestruturas Deportivas para o Concello da Lama. Estes novos recursos permitirán ao goberno local mellorar a eficiencia enerxética da fachada traseira do polideportivo municipal, situado no lugar de Pedreira.
Con estes 32.000 euros o Concello da Lama instalará unha fachada ventilada, que se porá adosada á actual fachada posterior. Estará formada por pilares ancorados á estrutura que existe na actualidade, paneis de sándwich de 30 mm de espesor e remates. O obxectivo final é mellorar a eficiencia enerxética de todo o edificio, que ten unha planta de 1063 m2.
O Plan Extraordinario de Infraestruturas Deportivas da Deputación, dirixido aos 59 concellos da provincia de menos de 50.000 habitantes, mobilizou ata o momento 1,7 dos 4 millóns de orzamento total, con achegas, ademais de para A Lama, para A Cañiza, A Estrada, Arbo, As Neves, Baiona, Barro, Cangas, Catoira, Cerdedo-Cotobade, Covelo, Crecente, Fornelos de Montes, Gondomar, Lalín, Marín, Meis, Mondariz-Balneario, Moraña, O Rosal, Pazos de Borbén, Poio, Redondela, Salceda de Caselas, Salvaterra, Valga, Vilaboa e Vilagarcía de Arousa.
