As achegas servirán para instalar sistemas sostibles de xestión da auga en Pontecesures, O Grove, Meis, Barro, Marín, Nigrán, Ponteareas e A Cañiza
A Deputación de Pontevedra vén de recibir novamente boas noticias dende Europa. Unha vez máis o Instituto para a Diversificación e Aforro da Enerxía (IDAE) concedeu subvencións a proxectos ata en 8 concellos da man da institución provincial. Deste xeito, as xestións realizadas pola Deputación permitiron que 692.300 euros cheguen a Pontecesures, O Grove, Meis, Barro, Marín, Nigrán, Ponteareas e A Cañiza para implantar sistemas sostibles de xestión da auga que permitirán un aforro enerxético do 28%. As actuacións teñen un orzamento total de 865.380 euros polo que o IDAE asume o 80% do coste. O orzamento restante está financiado pola Deputación con 78.090 euros (9%) e os concellos con 94.990 euros (11%).
Deste xeito, os concellos de Pontecesures (79.700 €), O Grove (78.500 €), Meis (79.850 €), Barro (67.840 €), Marín (79.080 €), Nigrán (123.250 €), Ponteareas (79.750 €) e A Cañiza (104.330 €) realizarán actuacións como o cambio de bombas de impulsión de auga ou a instalación de variadores de frecuencia nas súas Estacións Depuradoras de Augas Residuais (EDAL) e Estacións de Bombeo de Augas Residuais (EBAR).
Con esta subvención, as axudas concedidas polo IDAE no que vai de ano e xestionadas pola Deputación chegan aos 7,4 millóns de euros, destinados a 33 concellos da provincia e unha entidade local. Deles 2,3 millóns están a servir para a mellora das infraestruturas provinciais e a redución da pegada de carbono, 4 millóns teñen como destino a eficiencia enerxética e a iluminación exterior sostible e preto de 390.000 euros están destinados para o uso térmico en infraestruturas e instalacións municipais. A estas achegas súmanse agora os case 700.000 euros para implantar sistemas sostibles de xestión da auga.
