A GUARDA ACOLLE ESTE VENRES O CONCERTO “XUNTOS POLA MÚSICA”, UNHA HOMENAXE AO LEGADO MUSICAL DE JUAN PARDO

• O concerto celebrarase o 21 de agosto, ás 22:30 horas, na Alameda da Guarda

A Guarda, 18 de agosto do 2026.- A Guarda será escenario este venres, 21 de agosto, ás 22:30 horas, do espectáculo musical “Xuntos pola Música”, que se celebrará na Alameda.

A proposta ofrece unha homenaxe á figura de Juan Pardo, un dos grandes referentes da música e unha personalidade fundamental para entender a evolución da música de raíz galega nas últimas décadas. O espectáculo recupera parte do seu amplo repertorio a través das voces de Lys Pardo, Antonio Barros e iAlma, xunto ao músico Fernando Calderón.

A presenza de Lys Pardo, filla de Juan Pardo, achega ao concerto unha dimensión especialmente emotiva e unha conexión directa co legado do artista. Sobre o escenario, as diferentes voces e instrumentistas revisitarán algúns dos temas máis coñecidos da súa traxectoria, nunha proposta que combina tradición, contemporaneidade e entretemento.

“Xuntos pola Música” presta especial atención ao repertorio máis galego e de raíz de Juan Pardo, reivindicando a importancia dunha obra que contribuíu a difundir a cultura e a música galegas máis alá das súas fronteiras. O espectáculo presenta un son fresco e contemporáneo, sen perder a esencia das composicións orixinais, co obxectivo de achegar estas cancións a públicos de diferentes xeracións.

A traxectoria de Juan Pardo está profundamente vinculada á cultura galega. A súa obra, que transcendeu as fronteiras estatais, converteuno nun dos artistas máis recoñecidos e admirados da súa época e nun referente da música galega. O seu legado continúa formando parte da memoria colectiva e recibiu, entre outros recoñecementos, a Medalla de Ouro de Galicia.

O concerto da Guarda constitúe así unha oportunidade para revivir algúns dos grandes éxitos de Juan Pardo, descubrir ou redescubrir o seu repertorio e gozar dunha noite de música ao aire libre na Alameda.