O voceiro nacionalista, Fran Leiro, valora positivamente que Sanxenxo dispoña deste servizo, que foi solicitado pola veciñanza e polo grupo municipal do BNG, a través de mocións que foron rexeitadas polo Goberno do PP
Actualmente as persoas que opositan ou estudan carreiras universitarias teñen que desprazarse a Pontevedra e Cambados, ou usar as Bibliotecas Municipais, estando así condicionadas polos horarios e as actividades que se realizan nestas dependencias destinadas ao fomento da lectura nas crianzas
O grupo municipal do Bloque Nacionalista Galego (BNG) celebra que, despois de anos reclamándoa, a Aula de Estudo de Sanxenxo sexa unha realidade. As instalacións habilitaranse no Edificio de Usos Múltiples de Portonovo, no terceiro andar. O voceiro do grupo da oposición, Fran Leiro, lembra que foi o seu grupo o que deu traslado, a través de mocións plenarias, das “numerosas peticións” que realizaron os veciños e veciñas do concello que precisan dunhas dependencias cun horario axeitado para poder preparar oposicións ou exames. Ata o de hoxe, só podían usar a Rede de Bibliotecas Municipais, que conta cun horario a todas luces insuficiente, para dar resposta a esta demanda.
Leiro valora positivamente a medida, aínda que chegue tarde, e celebra que o Goberno de Telmo Martín vaia dando resposta ás demandas que o BNG propón pensando no benestar da veciñanza, ”aínda que sexa a través de mocións que o Partido Popular se nega a aprobar nos plenos”. Isto foi, precisamente, o que sucedeu hai uns meses, cando a finais de 2023 os nacionalistas presentaron unha moción plenaria para debater esta eiva. O mesmo sucede con outras actuacións, como o acondicionamento do pavillón da Florida, que “o Goberno local anunciou xusto despois de que o BNG fixera pública a situación”.
“Alegrámonos de que, aínda que sexa con anos de atraso, o señor Martín reaccione. O ideal sería que este tipo de actuacións se realizasen con moita máis axilidade, porque ao final demostrouse que a Aula de Estudo podía habilitarse en instalacións municipais, tal e como indicamos desde o BNG”, apunta Fran Leiro, quen, en todo caso, advirte de que o emprazamento elixido polo Goberno municipal presenta algúns problemas, como a falta de ascensor, o que limitará o acceso a persoas con mobilidade reducida, así como un horario que non contempla apertura nas fins de semana, nin os luns pola tarde. Ademais, tampouco é un espazo insonorizado.
Precisamente, Fran Leiro, acompañado dos seus compañeiros e compañeiras de partido, visitou esta semana as instalacións da Aula de Estudo de Moaña, que son un referente da comarca do Morrazo. “Estas instalacións, insonorizadas, climatizadas, con salas de traballo en grupo e cun horario amplo que inclúe fins de semana e festivos, son un exemplo do ben que se poden facer as cousas cando hai vontade, tendo a sensibilidade necesaria para dar resposta completa ás demandas presentadas pola cidadanía”, conclúe Leiro, quen non dubidou en transmitir os seus parabéns ao equipo de Goberno moañés, liderado pola nacionalista Leticia Santos.
