A Deputación celebra o Día Mundial do Medio Ambiente co inicio dos “Bosques Terapéuticos” en Meis. “Cada pequena acción pode mitigar os efectos do cambio climático e restaurar na medida do posible os ecosistemas que habitamos. Tomemos conciencia da importancia do día do medio ambiente e reivindiquemos medidas urxentes para o seu coidado e protección. Cada pequeno acto conta e o tempo apremia”. Con estas palabras concluíu o manifesto “Unha soa terra” de Miriam Campos, ao que esta docente e activista deu lectura este sábado no arranque do programa “Bosques Terapéuticos”, co que a Deputación celebra o Mundial do Medio Ambiente. Miriam Campos é presidenta da asociación Teachers for Future Spain e hai poucos días recolleu o premio “El Escarabajo Verde” de TVE á mellor iniciativa social medioambiental.
A deputada provincial Iria Lamas, xunto á alcaldesa de Meis, Marta Giráldez, estiveron nesta primeira ruta dos baños de bosque deste 2022, que discorreu pola Ruta da Pedra e da Auga en Meis e na que participaron 30 persoas, guiadas nesta experiencia por Sergio Portela. É o primeiro do total de 38 percorridos previstos ata o 25 de setembro, cun total de 1.1.40 prazas, e que percorrerán sete espazos naturais da provincia. Amais desta Ruta da Pedra e da Auga, os baños de bosque chegarán este ano ás illas de Tambo e Arousa, os Salóns do Lérez (Pontevedra); o Río Eifonso no espazo de Bembrive (Vigo); a Ponte Colgante do Lérez (Cerdedo-Cotobade e Campo Lameiro) e a Senda do Almofrei (Cerdedo-Cotobade).
