A concelleira Trinidad Fernández Oubiña reclamou maiores avances sociais para eliminar as desigualdades, a discriminación e a violencia contras as mulleres
A lectura dun manifesto, a cargo da concelleira Trinidad Fernández Oubiña, en favor da eliminación das desigualdades, a discriminación e a violencia contra as mulleres serviu de acto central no Concello da Lama para conmemorar o 8 de Marzo, Día Internacional da Muller, presidido polo alcalde David Carrera e que contou coa presenza do concelleiro de Cultura e Deportes, Plácido Pillado, así como da xuiza de Paz, Mercedes Fernández, a avogada do CIM, Adriana Fontaíña e a psicóloga do CIM, Galiza Aguete.
Este acto conmemorativo, celebrado no Salón de Plenos, inclúese dentro dun amplo abano de actividades promovidas e coordinadas polo Centro de Información á Muller (CIM), consistentes na posta en marcha de varios obradoiros relacionados cos estereotipos de xénero, igualdade no traballo e nas tarefas do fogar e que tiveron como protagonistas ao alumnado de educación infantil e primaria.
A concelleira de Igualdade, Trinidad Fernández Oubiña, sinalou na súa alocución que aínda que en España o marco normativo en materia de igualdade é un dos máis avanzados no mundo aínda estaba lonxe o obxectivo de acadar unha igualdade real entre homes e mulleres.
Fernández indicou que as mulleres, sobre todo no ámbito rural, “teñen un papel fundamental na loita contra a despoboación e o reto demográfico” e avogou por incrementar, desde o ámbito rural, a participación activa das mulleres na vida política e social local. “Estes compromisos débense plasmar no deseño e xestión dunhas políticas sociais que convertan as nosas sociedades en motores de transformación. É por elo que propoñemos incorporar a perspectiva de xénero en todas as nosas políticas e programas, aplicar medidas para garantir a igualdade salarial e de oportunidades no emprego promovendo a participación equitativa de mulleres en todos os niveis e sectores laborais e impulsar campañas de prevención e sensibilización contra a violencia de xénero dando apoio integral ás mulleres e traballando na erradicación da violencia machista”.
