O alumnado de 3º da ESO do IES de Mos participou esta semana no obradoiro “Música e Muller. Unha ollada desde a igualdade”, unha iniciativa promovida para fomentar unha visión crítica sobre a música moderna, un dos principais referentes culturais da mocidade.
A actividade, desenvolvida cunha metodoloxía participativa e vivencial, combinou a análise de letras de cancións de distintos estilos —como rap, pop, rock ou reggaetón— con dinámicas grupais e exercicios de expresión corporal e conexión emocional. O obxectivo: ir máis alá do consumo pasivo da música e entender o seu papel como ferramenta clave no proceso de socialización.
Durante as sesións, o alumnado traballou sobre cancións de artistas coñecidos para identificar as mensaxes que transmiten, prestando especial atención á presenza de contidos sexistas e á representación das mulleres. O enfoque non buscou sinalar xéneros musicais concretos, senón promover unha análise crítica e consciente, ao tempo que se puxeron en valor propostas musicais con mensaxes igualitarias.
Dende o Concello de Mos destacan a relevancia deste tipo de accións, subliñando que “é fundamental ofrecer á mocidade ferramentas para analizar de maneira crítica os contidos culturais que consomen a diario, especialmente nun ámbito tan influente como a música”.
A reflexión ampliouse tamén a outros espazos como a publicidade, os medios de comunicación ou as redes sociais, onde se analizaron os usos e representacións do corpo feminino, frecuentemente asociados a roles estereotipados. Neste contexto, o alumnado identificou desigualdades e presións sociais vinculadas á imaxe e á construción da identidade.
O obradoiro incorporou ademais exercicios de activación corporal orientados a traballar a expresión persoal, a xestión emocional e a confianza, abordando cuestións como a presión de grupo, a dificultade de mostrarse con autenticidade ou o impacto dos “gústame” e da exposición constante nas redes sociais.
Outro dos eixos centrais foi a análise dos estereotipos corporais e das normas sociais que condicionan a forma de ser e expresarse, incidindo na necesidade de cuestionar modelos normativos e avanzar cara á aceptación persoal.
O programa “Música e Muller” ten como finalidade concienciar á mocidade sobre a igualdade de oportunidades entre homes e mulleres, empregando a música como ferramenta pedagóxica para cuestionar realidades normalizadas e xerar pensamento crítico, ademais de visibilizar referentes femininos nun ámbito tradicionalmente masculinizado.
Dende o Concello de Mos ponse en valor o compromiso municipal con este tipo de iniciativas, sinalando que “apostar por programas como ‘Música e Muller’ é investir nunha mocidade máis crítica, consciente e comprometida coa igualdade”.
A actividade rematou cun espazo de posta en común no que o alumnado compartiu reflexións arredor do consumo cultural e a necesidade de construír unha sociedade máis igualitaria a través da educación e da análise colectiva.
