• A conselleira de Vivenda e Planificación de Infraestruturas, María Martínez Allegue, xunto co alcalde, Alejandro Lorenzo, presentou a actuación que supón un investimento de máis de 250.000 euros
• Prevese que as obras comecen en agosto e que poida estar a disposición dos veciños na primavera de 2025
• A senda, cunha lonxitude de 640 m, desenvolverase pola banda esquerda da estrada, acondicionarase a parada de autobuses e substituirase a marquesiña
• Avanzouse outra senda de case 1 km pola marxe dereita da PO-407 na zona do colexio de Budiño, cuxo proxecto se atopa en proceso de información pública
A Xunta licitou hoxe as obras dunha nova senda peonil en Budiño, na Vaquería, que comezará a construírse no verán cun investimento de máis de 250.000 euros.
A conselleira de Vivenda e Planificación de Infraestruturas, María Martínez Allegue, xunto co alcalde do Porriño, Alejandro Lorenzo, presentou hoxe no Concello esta actuación, que mellorará a seguridade viaria e a mobilidade na estrada PO-510 na Vaquería.
A Plataforma de Contratos da Xunta recolle esta contratación e fixa de prazo ata o 21 de maio para que as empresas interesadas presenten as súas ofertas.
Martínez Allegue concretou que se prevé que comecen as obras da senda en agosto para que poida estar a disposición da veciñanza de Budiño na primavera de 2025.
O obxectivo deste itinerario é permitir desprazamentos a pé en condicións de seguridade na parroquia de Budiño, en concreto neste tramo da PO-510.
Trátase de reforzar a seguridade e a mobilidade dos peóns nun treito de estrada que ten unha densidade de tráfico moi elevada, alcanzando máis de 20.000 vehículos diarios.
A senda, que terá unha lonxitude de 640 metros pola banda esquerda da estrada, será de formigón e terá 1,80 metros de ancho con bordo e unha elevación con respecto á rasante da calzada de 10 cm, agás nos accesos ás vivendas ou fincas.
Nas beirarrúas, e onde así o indique a normativa de accesibilidade, colocarase pavimento táctil nos vaos peonís, para aumentar a seguridade con sinais que fomentan a inclusión.
O proxecto tamén inclúe o acondicionamento da parada de autobuses e a substitución da marquesiña existente, para acadar maior comodidade dos usuarios do transporte público.
Estas intervencións enmárcanse no Plan de sendas de Galicia, a través do que a Xunta xa executou máis de 300 km de itinerarios peonís e ciclistas e prevé acometer nesta lexislatura outros 150 km máis.
Na súa intervención, a conselleira lembrou ademais que o departamento que dirixe ten planificada outra senda para esta zona de Budiño, un itinerario de preto de 1 km pola marxe dereita da estrada PO-407. Destacou que será un novo espazo seguro para tránsito peonil nunha zona con vivendas e de acceso ao colexio público Cruz de Budiño.
Detallou que o pasado venres comezou o proceso de información pública desta actuación co obxectivo de aprobar definitivamente o proxecto no outono para licitar as obras no primeiro trimestre de 2025, cun investimento de máis de 400.000 €.
Tamén subliñou que nos vindeiros días quedarán rematadas as obras de humanización das rúas Progreso e Buenos Aires, tras a mobilización dun orzamento de 1 M€ por parte do Goberno galego.
Pola súa banda, o alcalde, Alejandro Lorenzo, incidiu na importancia desta obra, moi importante e demandada pola veciñanza de Budiño, que xunto coa nova senda peonil que continuará ata o colexio do Budiño, garantirá a seguridade de peóns e vehículos na zona. “Seguimos dando pasos para mellorar a mobilidade e a seguridade viaria no Porriño, e este é un gran paso xa que se trata dun treito especialmente inseguro para os peóns”, concluíu.