Ámbolos dous alcaldes profundizaron na procura de fórmulas de cooperación mutua para defender infraestruturas nos dous concellos e ampliar os servizos que se prestan conxuntamente en materia de residuos sólidos urbanos e o CIM
O alcalde do Concello da Lama, David Carrera, mantivo unha xuntanza de traballo co seu homólogo de Cerdedo-Cotobade, Jorge Cubela, nun encontro que se produciu no Consistorio lamense para explorar novas vías de colaboración intermunicipal para mellorar servizos á veciñanza.
Carrera agradeceu a visita a Jorge Cubela e manifestoulle o seu desexo de explorar novas fórmulas de cooperación mutua para defender infraestruturas viarias nos dous concellos e ampliar os servizos que se prestan conxuntamente á veciñanza en materias relacionadas co Centro de Información á Muller (CIM) e o sistema de recollida e tratamento de residuos sólidos urbanos.
Ámbolos dous rexedores coincidiron na importancia de impulsar sinerxias entre concellos veciños “que sempre se entenderon e colaboraron para poñer en marcha proxectos de especial interese como foi, por exemplo recentemente, o obradoiro de emprego que capacitou a persoas en situación de desemprego para facilitar a súa integración no mercado laboral”.
Carrera e Cubela manifestaron o seu desexo de seguir traballando e buscando fórmulas de colaboración non so en materia social e de recollida e tratamento de residuos sólidos urbanos senón tamén na defensa de proxectos de carácter estréxicos como a promoción do turismo de interior na comarca das Rías Baixas ou de reivindicación de infraestruturas e servizos a prol da veciñanza de ámbolos dous concellos.
