• Os veciños levan anos pedindo que se mellore a seguridade vial en tres estradas provinciais, pero a Deputación negouse sempre a financiar estas obras.
• Operarios municipais encárganse da limpeza, bacheo e conservación das estradas provinciais para evitar que estean abandonadas.
Os deputados provinciais do Partido Popular, Jorge Cubela, Paz Lago e Javier Tourís, xunto ao concelleiro do PP de Catoira e delegado do Concello para a Xunta, Iván Caamaño, e veciños da zona visitaron Dimo, Catoira de Arriba e Oeste para interesarse pola situación de tres estradas que Deputación de Pontevedra ten nestas parroquias e reclamar ao Goberno provincial que mellore a seguridade viaria.
Recordan que nestas estradas xa se produciron varios accidentes con peóns que teñen que camiñar polas cunetas, xa que nin sequera hai beiravías en moitos dos seus tramos. Unha situación alarmante para os populares, “que pon en risco aos veciños cada vez que teñen que desprazarse a pé e que precisa dunha actuación urxente por parte do Goberno provincial”, defende Jorge Cubela.
Os veciños levan anos reclamando a construción de beirarrúas, pero desde o Goberno provincial atoparon sempre o rexeitamento a financiar estes proxectos. O voceiro local do PP, Iván Caamaño, sinala que hai varios tramos destas estradas que contan con proxectos, como por exemplo na parroquia de Dimo, que ascende a 435.431 euros, ou un primeiro tramo de Catoira de Arriba por 98.000 euros, “pero a Deputación non está pola labor de financiar as obras, e por iso desde o PP, apoiando aos veciños, presionaremos para que se leven a cabo”.
Nesta liña, Caamaño convida á presidenta da Deputación, Carmela Silva, a que visite Catoira e se desprace a pé polas mesmas cunetas polas que teñen que andar os veciños destas parroquias, para que entenda “dunha vez por todas que cesar o abandono no que se ten por parte da Deputación a Catoira”.
Como exemplo “deste abandono”, Caamaño explica que esta mesma semana o tractor do Concello de Catoira, “como fai sempre”, desbrozou as estradas da Deputación, “xa que desde a institución provincial non se fai”. Ademais, os operarios municipais encárganse da limpeza, do bacheo e da conservación das estradas da Deputación, “porque do contrario estarían intransitables”.