• Ao mediodía poderase degustar polbo á feira amenizado por Os Afoutes do Canón de Pau e á tarde, fabada de balde ás 20 horas
O alcalde de Cerdedo-Cotobade, Jorge Cubela, o tenente de alcalde Fernando Vázquez e os membros da Comisión de Festas de San Blas de Reboredelo Isabel Fentanes e Daniel Fariña fixeron público o programa lúdico-festivo que se desenvolverá o sábado 4 de febreiro.
O programa festivo arranca o sábado 4 de febreiro pola mañá coas salvas de bombas e pasarrúas a caggo da Asociación Cultural Os Afoutes do Canón de Pau. Ás 13 horas haberá misa solemne na Capela de San Blas, seguida de procesión.
A sesión vermú correrá a cargo do grupo de gaitas dos Afoutes do Canón de Pau e haberá un servizo de polbería a cargo de Polbeiría Fuchela para que os asistentes poidan degustar este manxar no entorno da festa ou mesmo levalo para as súas casas.
Pola noite, a partir das 20 horas, terá lugar unha degustación gratuíta de fabada para todos os asistentes. Unha hora máis tarde, comezará a verbena que estará a cargo dos grupos 3.COM e TIC TAC, dúas agrupacións moi coñecidas en toda a comarca polos seus ritmos e animación musical.
Todos estes actos desenvolveranse baixo unha gran carpa e haberá calefacción para facer máis agradable a festa e a estancia do público.
O alcalde, Jorge Cubela felicitou aos membros da comisión de festas polo programa deseñado para esta ocasión e animou á veciñanza a comezar ben o ano participando neste tipo de eventos festivos que contribúen a manter vivas as nosas tradicións e a dinamizar o medio rural.
