● Isabel Couselo: “urxe o cambio en Cuntis, parar o despilfarro e as débedas provocadas polo grupo socialista nos últimos anos e evitar o profundo retroceso que nos espera se non o impedimos”.
O presidente do Partido Popular de Pontevedra, Luis López, sinalou hoxe que o PP cumpre a súa responsabilidade e ofrece en Cuntis “un proxecto serio, o de Isabel Couselo, que é o da xente de Cuntis, un proxecto centrado no desenvolvemento deste concello e en atender aos veciños e non en vivir deles”.
Foi durante o xantar organizado polo PP local para presentar a candidatura coa que concorren ás eleccións municipais do 28 de maio, e no que tamén participou o responsable de Cultura e Educación do goberno galego, Román Rodríguez. Luis López lamentou que “Cuntis sexa noticia polos pufos do goberno local”. Nesta liña, criticou a xestión dun concello “que admite 600.000 euros de débeda, pero que é posible que pase longamente do millón de euros; un concello que, dende que o PP deixou a Alcaldía no ano 2015, xa non paga axeitadamente aos provedores, moitos deles empresas e autónomos de Cuntis; un concello que pode tardar máis de sete meses en abonar unha factura; e un concello que está inmerso nun Plan de Axuste pola súa mala xestión que recolle, expresamente, a posibilidade de subir impostos e incluso de crear algúns novos”. E chamou a atención con que “é un aviso a navegantes do que vai facer o alcalde se volve gañar as eleccións, que agardamos que non porque iso sería volver a perder outros catro anos”.
Pero, o peor de todo, continuou o presidente popular, “é que todo isto aínda podería ter un pase se o mal goberno socialista que ten Cuntis estivera facendo investimentos, impulsando equipamentos ou abrindo novos servizos públicos, pero a realidade é que non. Só hai que pasar por Cuntis para ver que, máis aló dalgunha peonalización e corte de rúas, todo está igual que hai oito anos. E iso sen falar da súa importante zona rural, das súas parroquias, abandonadas completamente”.
Durante a súa intervención, López destacou que “tanto o PP de Cuntis como eu cremos que hai que ampliar e mellorar o polígono da Ran, pero hai que facelo con sentidiño, como se fan todos os polígonos”. E recordou que Zona Franca leva prometidos polígonos na Guarda, O Rosal, A Cañiza, Poio, Forcarei, Marín, A Lama, Pontevedra, Caldas, Tui, Valga, Vilanova, Vilagarcía, Rodeiro, Barbadás e ata O Carballiño… “E a historia confirma que a Zona Franca fala moito e fai pouco ou máis ben nada”, pero, o peor de todo, é que propón aos concellos convenios nefastos economicamente para os intereses dos veciños.
Pola súa banda, a candidata sinalou que “urxe o cambio en Cuntis, parar o despilfarro e as débedas provocadas polo grupo socialista nos últimos anos e evitar o profundo retroceso que nos espera se non o impedimos”. Dixo chegar “con moita ilusión e preparada para afrontar este reto. E, sobre todo, convencida de que somos a única alternativa capaz de poñer freo e sacar ó noso concello do profundo estancamento no que leva demasiado tempo”. Para conseguilo, presenta “un proxecto moi ambicioso” e está acompañada “do mellor equipo”.
“Cremos nun Cuntis grande, con emprego, cheo de vida e oportunidades; e tamén cremos nun Cuntis moderno, atractivo, capaz de potenciar os seus recursos e poñelos en valor. Somos o cambio que necesita Cuntis. Merecemos un Cuntis mellor e podemos logralo entre todos”, engadiu.
CANDIDATURA DO PP DE CUNTIS
- MARÍA ISABEL COUSELO TORRES
- MARÍA JOSÉ LIÑEIRA ASOREY
- ROBERTO CAMPOS LÓPEZ
- SALVADOR SANTIAGO PEREIRA PENA
- JOSÉ RAMÓN FERREÑO REGUEIRO
- MARGARITA MARÍA ESCARIZ FUENTES
- JOSÉ MANUEL PORTO GARCÍA
- JOSÉ ANTONIO FERNÁNDEZ DUARTE
- MARÍA JESÚS FERRO AGRA
- RAMIRO GARCÍA GONZÁLEZ
- MARÍA JOSÉ REY VERDURA
SUPLENTES:
- RUBÉN NÚÑEZ PAMPÍN
- JOSÉ MANUEL FUENTES RIVERA
- JULIA CASTRO IGLESIAS
- MARÍA LUZ GARCÍA GUERRA
- OLIMPIO REY COTO
