Desde Sanxenxo (onde foi trasladada a ambulancia) a Caldas os tempos de resposta son de máis de 40 minutos, en vez de oito desde o hospital do Salnés
“O Centro de Saúde de Caldas de Reis atópase baixo mínimos históricos, froito dos continuos recortes da Xunta do PP na nosa Sanidade Pública, que impiden prestar o servizo de calidade ao que teñen dereito os nosos veciños e veciñas”, denunciou o portavoz municipal Manuel Fariña.
Fariña denunciou que non se cubran baixas nin vacacións do persoal sanitario, o que leva consigo que o centro de saúde estea baixo mínimos sen o persoal necesario que permitiría unha atención sanitaria en condicións. Lembrou o portavoz municipal do BNG que os veciños e veciñas teñen que agardar durante horas para ser atendidos no PAC, e que en caso de ser trasladadas a urxencias do hospital de Montecelo, teñen que agardar horas en ser atendidos, debido ao o colapso que se vive en Montecelo.
A maiores, denuncia Fariña, o feito de que a ambulancia medicalizada se trasladase no verán do Hospital do Salnés a Sanxenxo, supón un grave prexuizo para a veciñanza de Caldas, xa que uns tempos de resposta de máis de 40 minutos, fan que non sexa operativo enviar a ambulancia desde Sanxenxo para atender as urxencias máis graves.
Unha ambulancia medicalizada no hospital do Salnés é imprescindíbel para garantir unha resposta rápida e eficaz ante calquer problema grave de saúde. Lembremos que os tempos
medios de resposta desde Vilagarcía a Caldas son 8 minutos (15 a San Clemente ou Carracedo, pero só 2 a Godos ou 7 a Saiar). “Esiximos, polo tanto, que unha ambulancia medicalizada estea sempre operativa desde o hospital do Salnés, único xeito de garantir unha rápida actuación en caso de doentes graves. Os veciños e veciñas de Caldas queren e esixen un servizo sanitario público eficiente e de calidade, e o BNG vai estar sempre do seu lado para conseguilo”, explicou Manuel Fariña.