O Concello de Mos será escenario este mércores 15 de abril dunha nova edición do Campionato Galego de Natación Adaptada, unha cita organizada en colaboración coa Federación Galega de Deporte Adaptado e que terá lugar na piscina municipal Óscar Pereiro en horario de 10:30 a 13:30 horas.
A competición reunirá un total de once clubs procedentes de distintos puntos de Galicia, cun volume destacado de participación que evidencia o crecemento e consolidación desta disciplina deportiva no ámbito autonómico. En concreto, os clubs participantes e o número de nadadores inscritos son os seguintes:
• ACEESCA: 22 deportistas
• ASPANAEX: 34 deportistas
• ASPAVI: 19 deportistas
• CN Ponteareas: 18 deportistas
• Esclavas: 5 deportistas
• Juan XXIII: 16 deportistas
• Méndez Núñez: 13 deportistas
• Menela: 15 deportistas
• Saiar: 15 deportistas
• San Rafael: 14 deportistas
• San Xerónimo: 12 deportistas
A xornada incluirá probas de diferentes estilos e categorías, adaptadas ás características dos participantes, consolidándose como unha das citas máis relevantes do calendario galego de deporte adaptado. Segundo o programa oficial da competición, disputaranse probas como 50 e 100 metros libres, espalda, braza e mariposa, ademais de relevos.
Desde o Concello de Mos subliñan a importancia de seguir promovendo eventos inclusivos que dean visibilidade ao deporte adaptado e fomenten a participación en igualdade de condicións.
