Así o informaron a alcaldesa, Nidia Arévalo, e o edil de Obra Pública, Camilo Grandal, que deron conta en Xunta de Goberno do comezo do procedemento de contratación da obra, financiada nun 80% por Augas de Galicia, e cuxos traballos iniciaranse nun mes
A alcaldesa de Mos, Nidia Arévalo, e o seu tenente de alcaldesa e concelleiro de Obra Pública, Camilo Grandal, deron conta en Xunta de Goberno Local do inicio do procedemento de contratación por parte da administración local mosense da obra de acometida da instalación da rede de saneamento no tramo da Estrada Nacional 550 ao seu paso pola parroquia de Louredo.
Prevese que, unha vez finalizado o proceso de contratación, poderán iniciarse as obras, que se estima poidan comezar xa no prazo dun mes. Os traballos realizaranse grazas á sinatura dun convenio de colaboración entre o Concello e a entidade Augas de Galicia dependente da Consellería de Infraestruturas e Mobilidade da Xunta de Galicia. O custo total das actuacións contempladas neste convenio ascende a 22.648,32 € do cal Augas de Galicia financiará o 80% do importe total final da actuación ata un máximo de 18.118,66 € e o Concello de Mos asumirá o 20% restante.
O proxecto ten como obxectivo as obras necesarias para realizar a “rede de saneamento na Estrada N-550 tramo 1- parroquia de Louredo”, e completar ditas redes e permitir que dito servizo de saneamento dea servizo á máxima extensión do concello. Co fin de chegar a todos aqueles lugares e vivendas do concello de Mos, que aínda carecen deste servizo. Levarase a cabo a execución de 187,00 ml de saneamento.
As obras consisten na canalización das diferentes tubarías de PVC destinadas á rede de saneamento incluíndo todas as operacións complementarias: excavacións, pozos, reposicións…
O prazo de execución que se estima para a execucións das obras é de seis (6) semanas para o colector que se proxecta, incluído o estudo e preparación das mesmas. Dito prazo comezará a contar a partir do día seguinte ao da sinatura da Acta de Comprobación do Replanteo, entre a dirección de obra e a empresa contratista das mesmas.
As actividades que máis condicionan a duración dos traballos son a excavación e montaxe de tubarías e pozos de rexistro.