O BNG de Meaño denuncia a sistemática obstaculización no seu labor de oposición que sofre por parte do alcalde, Carlos Viéitez.
Ás portas do próximo Pleno ordinario, a celebrar presumiblemente o próximo xoves 11 de abril, e despois da última comisión informativa celebrada o venres 5 de abril, o BNG de Meaño segue vendo como o alcalde Carlos Viéitez obstaculiza sistematicamente a labor da oposición.
A Alcadía desestimou unha das mocións que a concelleira do grupo nacionalista pretende defender no próximo pleno sobre a existencia de vertidos de augas fecais no Río da Chanca á altura do Muíño da Birta no lugar de Abuín, na parroquia de Dena. Esta situación xa foi denunciada polo BNG de Meaño dándolle voz ás queixas da veciñanza; recentemente tamén o fixo o Colectivo Ecoloxista do Salnés. O acordo proposto polo BNG consiste en instar á xunta de Galicia para que controle o estado do río e se erradiquen os vertidos, mais este non foi aceptado na comisión informativa que precede ao pleno. O BNG non comprende a negativa da Alcaldía a debater este asunto no Pleno, buscando solucións para mellorar a calidade da auga do río e preservar a Ría de Dena nos Pasales, lugar de moito interese pola súa paisaxe e biodiversidade.
O BNG contempla o esperpento a este respecto: o alcalde escúdase en cuestións competenciais para escusar a inacción ante as verteduras, mais cando se lle insta á reclamar solucións a Augas de Galicia oponse, afirmando que teme a que dito organismo saque as cores ao Concello polas deficiencias no saneamento municipal. En resume: o único que lle preocupa é non quedar mal, ou, ter que traballar e xestionar para evitar a morte dos nosos ríos e regatos.
Outra mostra máis das trabas que pon o Goberno Municipal á labor da oposición que o BNG está a desenvolver en Meaño é a privación dun local onde a organización desenvolva a súa actividade política. A organización solicitou xa fai 6 meses este espazo, baixo o amparo da Lei de Administración Local de Galiza e do Regulamento de Organización e Funcionamento das Entidades Locais. Así mesmo, o BNG de Meaño ten constancia da dispoñibilidade de diversos espazos inutilizados no concello, polo que non se xustifica a negativa da Alcaldía, con quen falou en numerosas ocasións sobre o tema.
A organización continuará exixindo este lugar que por dereito lle corresponde.
