As excelentes condicións metereolóxicas animaron a participación de devotos e visitantes que se achegaron ata a igrexa parroquial
O alcalde de Portas, Ricardo Martínez, e as concelleiras Ana Peña e Chus Fontán participaron nos eventos lúdicos e relixiosos celebrados esta mañá con motivo das Festas de San Benito de Lantaño onde as boas condicións metereolóxicas favoreceron a gran afluencia de devotos e visitantes que ateigaron as inmediacións da igrexa parroquial.
As misas comezaron ás 8 da mañá e foron celebrándose de hora en hora ata chegar as 13 horas momento en que tivo lugar a Misa Solemne que contou coa presenza do alcalde, Ricardo Martínez. Unha vez rematado o oficio tivo lugar a tradicional procesión que estivo moi concurrida e foi acompañada polos acordes da Banda de Música Unión de Lantaño.
Como vén sendo habitual os devotos de San Benito foron achegando ao longo da xornada as súas ofrendas e donativos para o santo que posteriormente foron obxecto dunha poxa que resultou tamén moi activa e participativa por parte do público presente.
Nas inmediacións da igrexa parroquial de San Pedro de Lantaño instaláronse tamén os tradicionais postos de cerereiría, polbo á feira e churrasco así como rosquilleiras que ambientaban coa súa presenza este evento relixioso con grande participación de devotos e visitantes.
Pola noite, a Comisión de Festas ten previsto comezar a verbena ás 21 horas e correrá a cargo da coñecida orquestra Unión y Fuerza.
Os membros da Comisión de Festas agradeceron a colaboración do Concello de Portas, os establecementos comerciais que axudan económicamente á organización desta actividade lúdica e relixiosa e tamén á Comunidade de Montes de Lantaño e a Protección Civil de Portas.
O alcalde, Ricardo Martínez felicitou á Comisión de Festas pola organización deste ano e tamén por “manter vivas unhas tradicións que nos identifican como pobo ao tempo que dinamizan as nosas zonas e lugares rurais desde un punto de vista cultural e social”, sinalou o rexidor.