Os nacionalistas consideran que a organización das festas debe compatibilizarse co respecto á actividade económica e á vida diaria da cidadanía
O Portavoz do grupo municipal do BNG da Estrada, Xoán Reices, manifestou a súa preocupación polo malestar trasladado por numerosos comerciantes e veciños a consecuencia das afeccións derivadas da celebración das Festas de San Paio.
A formación nacionalista sinala que durante as festas de San Paio prodúcense situacións que xeraron importantes molestias, entre elas a retirada temporal de contedores, os cortes de tráfico, as limitacións de acceso a determinadas rúas e a falta de información previa suficiente sobre as medidas adoptadas.
Desde o BNG subliñan que as festas patronais constitúen un dos principais acontecementos sociais e culturais do municipio e que deben seguir contando co apoio da veciñanza. Consideran, non obstante, que esa realidade non pode servir para ignorar os problemas que determinadas decisións organizativas provocan sobre a actividade económica e a vida cotiá de moitas persoas.
“A cuestión non son as festas. A cuestión é como se organizan as festas e ata que punto se ten en conta ás persoas que viven e traballan nas zonas afectadas”, sinalan os nacionalistas.
Segundo o BNG, comerciantes e residentes trasladaron unha sensación xeneralizada de falta de información e de escasa consideración cara ás dificultades que tiveron que afrontar durante varios días.
A formación considera especialmente preocupante que decisións que afectan directamente ao funcionamento dos negocios, á mobilidade ou á xestión dos residuos non fosen acompañadas dun proceso de comunicación máis amplo e eficaz.
“O Concello ten a obriga de garantir a compatibilidade a celebración dos eventos festivos co respecto ao comercio local e á veciñanza. As festas son de todos e deben organizarse contando con todos”, afirman.
O BNG entende que esta situación debe servir para abrir unha reflexión sobre os mecanismos de planificación, información e coordinación empregados durante as festas patronais, co obxectivo de evitar que situacións semellantes se repitan en futuras edicións.
Desde a organización nacionalista insisten en que a participación, o diálogo e a información previa constitúen ferramentas fundamentais para garantir unha convivencia equilibrada entre a actividade festiva, a actividade económica e os dereitos da cidadanía.“Non é razoable que comerciantes e veciños teñan a sensación de que se decide sobre eles sen contar con eles. A mellor maneira de fortalecer as nosas festas é facelo desde o respecto, a comunicación e a colaboración coa veciñanza”, conclúen.
