Unha vez que logramos paralizar a inxusta subida de impostos que o PSOE quería impor á veciñanza de Meis é o momento de buscar solucións aos problemas de financiación que sofren os concellos por culpa da Xunta e o goberno central e que non deben ser pagados pola veciñanza con subidas de impostos.
Tras a entrada en vigor da Lei 27/2013 O Servizo de Axuda no Fogar foi un dos dereitos incluídos na Lei de dependencia. O concello de Meis está a prestar este servizo cuns custos que superan até case dobrar o financiado pola Xunta e o Estado. Isto obriga ao concello de Meis a consignar unha moi importante cantidade de fondos propios para financiar este servizo.
Por outra parte, a Xunta implantou a universalización da educación infantil 0-3 anos, mais mantén o copago aos concellos. É dicir, nun concello no que só existan escolas infantís privadas a Xunta financia o 100% dos custes do servizo. Pola contra, naqueles concellos no que haxa escolas municipais a Xunta esíxelle a eses concellos a que copaguen. A Xunta do PP non ten problema por financiar as empresas privadas que xestionan escolas infantís pero négase a liberar aos concellos dun gasto impropio dun servizo que xestiona en exclusiva a Xunta.
Estes dous exemplos de servizos de competencia non municipal supoñen, por parte do concello, unha cantidade de cartos que poderían ser dedicados a competencias propias do concello e que, pola contra, hai que dedicar a financiar competencias da Xunta de Galiza para a súa publicidade
Por todo o anterior, o BNG de Meis solicita á Xunta de Galiza e á Administración Xeral do Estado o financiamento íntegro do SAF, e tamén que a Xunta de Galiza asuma o 100% dos custes da escolas infantil, toda vez que anunciou e asumiu a xeneralización da gratuidade 0-3 anos das escolas infantís e está a financiar integramente os custes das escolas infantís privadas.
