O BNG de Vilagarcía amosará no vindeiro pleno municipal o seu rexeitamento a unha nova concesión da Nave do Cavadelo situada enriba da desembocadura do río do con.
O Pleno Municipal do 25 de Abril aprobou por maioría instar a Augas de Galicia e á Consellería de Medio Ambiente a retomar os traballos para executar as actuacións previstas no Proxecto de 2008 de prevención de inundacións no chamado “Tramo 0” que corresponde coa desembocadura do río do Con, sobre a que se asenta unha nave. Dita nave, cuxa concesión en precario rematara en Decembro de 2023, dificulta a apertura da desembocadura do río do Con, impedindo a libre evacuación das súas augas, en caso de episodios de choivas torrenciais e enchentas, como aconteceu nas de 2006.
Dende Marzo deste ano, a Autoridade Portuaria, veu cedendo dita nave á Real Federación Galega de Vela, que xa mostrou o seu interese por solicitar unha nova concesión por outros 15 anos, aboando a cantidade de entre 15.000-20.000 € anuais que, de materializarse imposibilitaría a liberación do cauce do río.
Dende o BNG entendemos que a Autoridade Portuaria non debería actuar contra a cidadanía, antepoñendo os seus intereses económicos aos intereses xerais, a seguridade dos seus habitantes, propiedades e negocios, polo que esiximos á autoridade portuaria que se abra á cidadanía e renuncie á prorroga da concesión.