Desde hai meses, a rúa San Roque vén sufrindo problemas no tramo que discorre entre a gasolineira e a Praza da Independencia como consecuencia do grave deterioro dunha rede de saneamento que non experimentou reformas desde hai máis de trinta anos. O estado de deterioro das tubaxes de fibrocemento é tal que, periodicamente, prodúcense graves problemas de retorno de augas fecais nos baixos de distintos establecementos comerciais, a pesar dos intentos de limpeza e desatasco pola empresa que realiza o mantemento da rede na vila, ocasionando un prexuízo económico e de salubridade do vecindario, que ten que soportar a pestilencia no ambiente. Estes verquidos sucédense mesmo en períodos en que non se producen choivas e, polo tanto, inatribuíbles á mestura coa rede de pluviais. Cómpre, por tanto, acometer unha reforma integral de dita rede, que deberá vir acompañada doutras demandas veciñais, como a humanización dese tramo que, lembremos, é parte da ruta oficial do desfile de San Roque, precisando máis ancho da beirarrúa e unha mellora do obsoleto alumeado que permitirían prolongar o paseo desde a Praza da Independencia e, con iso, unha maior actividade comercial. Desde o BNG entendemos que se trata, en definitiva, dunha intervención necesaria, cuxo proxecto e execución deberían ser tidos en conta desde o punto de vista orzamentario xa neste ano 2024.