Os nacionalistas presentarán no vindeiro Pleno ordinario unha moción para solicitar ao Goberno local medidas que sirvan para habilitar “un punto de encontro para os nosos mozos e mozas”
O Bloque recorda que o modelo de lecer predominante que existe actualmente na vila está moi vencellado á hostalería e aos establecementos privados, de aí que sexa necesarias unhas instalacións “que favorezan unha socialización máis diversa, igualitaria e enriquecedora”
A día de hoxe Sanxenxo presenta unha eiva moi importante no que se refire ao ofrecemento de espazos de lecer específicos para a xente moza. É por iso polo que desde o grupo municipal do Bloque Nacionalista Galego promoven unha proposta para habilitar áreas destinadas ao divertimento e esparcemento da xuventude, que faciliten a convivencia e a socialización en condicións seguras e accesibles, non condicionadas ao consumo.
O responsable local do Bloque, Adrián González, confirmou que o grupo presentará no vindeiro Pleno ordinario, que terá lugar o 30 de marzo, unha moción para instar ao Goberno local a estudiar a viabilidade da creación e posta en marcha dun espazo específico para a mocidade no concello, que sirva para consolidarse como punto de encontro e de lecer alternativo. Entenden os nacionalistas que o devandito espazo debería contar con recursos como sala de xogos de mesa, futbolíns, mesas de billar, sala de cine ou proxeccións audiovisuais e zonas de descanso, garantindo as condicións axeitadas en materia de accesibilidade, seguridade e mantemento. Para facilitar o seu uso, o BNG propón que este espazo sexa o máis céntrico posible, adoptándose, ao mesmo tempo, medidas que faciliten o desprazamento desde outras parroquias, ben sexa a través do transporte público ou doutras alternativas de mobilidade. Na moción, asemade, inclúese un punto no que se solicita ao equipo de Goberno que informe ao Pleno, nun prazo de 3 meses, sobre a viabilidade da proposta, incluíndo posibles emprazamentos, custos estimados e vías de financiamento.
Adrián González lembra que “actualmente en Sanxenxo o modelo de lecer predominante está moi vencellado á hostalería, en establecementos privados. Esta realidade limita as opcións de ocio para unha parte importante dda nosa xuventude e non sempre favorece hábitos saudables nin dinámicas inclusivas”. Por iso, o responsable local e concelleiro nacionalista entende que “é necesario promover alternativas, a través de espazos nos que se facilite a socialización e que sexan punto de encontro para os mozos e mozas de Sanxenxo”.
