Celebrarase unha xuntanza no Multiusos da Lama con aquelas persoas interesadas en colaborar nesta iniciativa investigadora.
O Concello da Lama colabora co grupo de investigación FS1 Fisioterapia Clínica da Universidade de Vigo nun proxecto científico que analizará os efectos do contacto coa natureza no organismo humano. A iniciativa, denominada “Proxecto EVA” conta tamén coa participación do IIS Galicia Sur e conta co apoio do Plan Social ENCE.
Dentro desta colaboración, o vindeiro luns 1 de xuño, ás 11:30 horas, celebrarase no Edificio Multiusos da Lama unha reunión presencial informativa destinada a todas aquelas persoas interesadas en participar no estudo.
As investigadoras encargadas do proxecto son Eva Mª Lantarón Caeiro, profesora da Facultade de Fisioterapia e investigadora principal do Grupo de Fisioterapia Clínica, e Ana Gil Iglesias, investiadora do Programa de doutoramento CREA do Campus de Pontevedra.
O obxectivo desta investigación é afondar no coñecemento dos beneficios que os espazos naturais poden ter sobre a saúde e o benestar das persoas, promovendo ao mesmo tempo a participación cidadá na ciencia.
O alcalde da Lama, David Carrera, destacou a importancia de que o municipio participe en iniciativas innovadoras ligadas á saúde e ao medio natural. “A Lama é un concello privilexiado pola súa contorna natural e este tipo de proxectos permítennos poñer en valor os nosos recursos ao tempo que colaboramos co avance científico”, sinalou.
Carrera tamén animou á veciñanza a sumarse á iniciativa: “Facemos un chamamento á participación da cidadanía porque este estudo pode contribuír a mellorar o coñecemento sobre a relación entre natureza e saúde, ademais de situar A Lama como un referente neste tipo de experiencias”.
As persoas interesadas en obter máis información ou participar poden contactar coa organización a través do teléfono 649 543 500.
