As árbores creadas polas participantes do Círculo de Mulleres de Covelo estarán expostas na entrada do Concello para compartir coa veciñanza as súas reflexións sobre o significado de ser muller no rural.
O Concello de Covelo conmemora este 15 de outubro o Día Internacional da Muller Rural, unha data para recoñecer o papel fundamental das mulleres na vida das nosas comunidades, no mantemento das tradicións e na transmisión dos coñecementos que forman parte da identidade do rural.
Con motivo desta celebración, o Círculo de Mulleres de Covelo preparou, na súa última sesión, unha actividade especial centrada na figura da muller rural. As participantes elaboraron unhas árbores debuxadas que, a través da súa simboloxía, representan as súas vivencias, reflexións e o que significa para elas ser muller no rural.
As creacións estarán expostas na entrada do Concello de Covelo, onde poderán ser visitadas pola veciñanza. A iniciativa busca dar visibilidade ás voces das mulleres rurais e compartir unha reflexión colectiva sobre as súas experiencias, o seu papel na sociedade e a importancia de seguir construíndo espazos de encontro e participación.
O Círculo de Mulleres de Covelo é un espazo de encontro, escoita e benestar no que as participantes poden compartir experiencias, conectar consigo mesmas e medrar xuntas.
Con esta iniciativa, o Concello súmase á celebración dunha data que lembra a importancia de recoñecer e valorar o traballo das mulleres rurais, mulleres cuxo compromiso e esforzo contribúen cada día a manter viva a nosa terra.
Como as árbores que hoxe protagonizan esta exposición, as mulleres rurais teñen raíces fondas que sosteñen a nosa identidade e seguen facendo medrar o futuro de Covelo.
O Concello de Covelo conmemora o Día Internacional da Muller Rural cunha iniciativa do Círculo de Mulleres
