Presenta unha alegación ao anteproxecto na que pide que se aproveite a oportunidade de recoñecer a realidade do único municipio insular de Galicia
O Concello da Illa de Arousa vén de presentar unha alegación ao anteproxecto da Lei de Ordenación do Litoral de Galicia na que solicita de novo que se recoñeza a singularidade do territorio insular, rematando coas limitacións derivadas da normativa que incide sobre o seu litoral e as cortapisas da súa aplicación práctica.
O goberno local suxire que se aproveite “en positivo, esta nova modificación da Lei para introducir unha cláusula na que se recoñeza a singularidade do único municipio insular de Galicia e non se perda esta nova oportunidade”.
Na alegación o Concello recorda que leva desde a segregación, no ano 1997, pedindo que se recoñeza esta realidade “única e singular dende as normativas tanto autonómica como do estado”, tendo en conta que os valores que definen o territorio de A Illa de Arousa son o litoral e o medioambiente, con recursos como o parque natural de Carreirón ou Monte Palmeira.
O Concello apunta que o solo é na Illa un ben escaso, o que fai que a dotación de novas infraestruturas ou a recuperación dos frontes marítimos, recollidos no Plan Xeral de Ordenación Municipal, coa normativa actual “vese imposible de executar”. Engade que a Zona Urbana Consolidada ocupa un territorio pequeno e moi compacto, polo que a súa conservación e transformación para que siga existindo como motor social e económico pasa por ter en conta os condicionantes da insularidade e singularidade, “e moitas veces iniciativas para poñer en valor este litoral atópanse con cortapisas xeneralistas que non teñen en conta estes condicionantes”.
A alegación arousana fai referencia tamén ás relacións interadministrativas entre as diferentes administración con competencias no litoral, indicando que o modelo territorial que debe primar nun municipio singular, tanto desde o punto de vista urbanístico como ambiental, “debe ser diverso e equilibrado, que teña en conta unha ordenación territorial suxeita á norma das distintas administracións, complementándoo con todas as actividades que aquí se desenvolven, sen que unhas se antepoñan a outras”.
Engade o escrito de alegacións un relatorio das consecuencias da apertura da Ponte sobre un tecido urbano que se conformou sen coches, con rúas estreitas e sen garaxes e que agora rexistra unha media de 2,5 coches por unidade familiar, a modo de exemplo dun municipio que evolucionou en canto aos sectores productivos e ao modo de vivir pero que segue encorsetado por unhas normativas que obvian a identidade arousana
A redacción dunha nova normativa do calado da Lei de Ordenación do Litoral permite o recoñecemendo da tan demandada singularidade para que a futura lexislación nesta materia se converta nunha ferramenta válida para o desenvolvemento sostible da Illa.
